फक्त बंडातात्याच नाही तर जगभरात बिल गेट्सने कोरोना आणला हि अफवा फेमस आहे
हा कोरोना म्हणायचं कि आणि काय कळेना. रोज नवनव्या बातम्या आणि रोज नवनव्या अफवा. आपली तर सुरवात काय तर घंटा वाजवून झाली. रोज कोमट पाणी आणि काढा हा तर जीवनाचा भाग झाला. युट्युब वाल्यानी तर उच्छाद मांडलाय. सारखं उठून कुठल्या तर डॉक्टरच नाव घेत काय न काय उपचार सांगितले जात आहेत.
कोण प्राणायाम सांगालय तर कोण होमिओपथी. हे सगळं चालू असताना मृत्यूची संख्या कमी होताना दिसत नाही. काय खरं काय खोटं कळेना. चीनच्या नावाने बोटं मोडून मोडून दुखायची वेळ आली पण कोरोना काय थांबायचं नाव घेईना.
त्यात लसी आल्या आणि अजून कन्फ्युजन वाढलं. रशिया वाले म्हणत्यात आमची लस ९०% इफेक्टिव आणि कोण काय वेगळा दावा करतंय. सगळं गोंधळ झालाय.
अशातच हे सगळं कमी कि काय म्हणून हभप महाराज बंडा तात्या कराडकर यांनी आज एक प्रसिद्धी पत्रक काढलं. ते यात म्हणाले,
“कोरोनाला नागरिकांनी घाबरून जाऊ नये. हा जीवघेणा रोग नाही. तो बिल गेट्स यांच्या डोक्यातील कल्पना आहे. आयुर्वेदात त्याच्यावर उपचार आहेत पण सरकार त्याला प्राधान्य देत नाही. त्यांना गेट्सने बनवलेली औषध खपायची आहेत म्हणून हा सगळा बनाव सुरु आहे.”
हे ऐकल्यावर जनतेच्या बत्त्या उडाल्या. अनेक जण तर वारकरी संप्रदायातील एवढे मोठे महाराज म्हणतात तर त्यात काही तरी खरं असणार असं मानून जातायत. यापूर्वी देखील श्री.शिवप्रतिष्ठानचे भिडे गुरुजी यांनी देखील कोरोना हा काही रोग नाही वगैरे मते मांडली होती.
सोशल मीडियावर या सगळ्यांना जोरात ट्रोल करण्यात आलं. नेटकऱ्यांनी त्यांचे अक्षरशः वाभाडे काढले. इकडं लोक मरत आहेत आणि महाराज शहाणपणा शिकवालेत असंही काहीजण म्हणत होते.
पण मुख्य प्रश्न आला की पंढरपूरच्या महाराजांना बिल गेट्सने कोरोना आणलाय असं का म्हणावसं वाटलं? बिल गेट्सचं का ? मार्क झुकरबर्ग, गेला बाजार आपले अंबानी वगैरे यांची नाव त्यांनी का घेतली नाहीत?
आमच्या एका भिडूने याची लिंक दिली आणि आमचं डोकं भिरभीरलं. बिल गेट्स ने कोरोना तयार केलाय हि अफवा फक्त भारतात नाही तर जगभरात फेमस आहे. मोठमोठ्या देशातले सुशिक्षित लोक याला खरं मानतात, त्यावर चर्चा करतात.
बिझनेस टुडे या वृत्त संस्थेच्या दाव्यानुसार गेल्या वर्षी जेव्हा कोरोनाची साथ सुरु झाली तेव्हा फक्त फेब्रुवारी ते एप्रिल या तीन महिन्यांचा डाटा बघितला तर जगभरात तब्ब्ल १२ लाख वेळा टीव्ही चॅनेल आणि सोशल मीडियावर बिल गेट्सचा कोरोना निर्माण करण्यात हात आहे का यावर चर्चा झाली. न्यूयॉर्क टाइम्स सारख्या वृत्तपत्रात त्याचा डिटेल ऍनालिसीस छापून आलाय.
आता बिल गेट्स कोण हे आपल्याला वेगळं सांगायची गरज नाही.
मायक्रोसॉफ्ट सारख्या क्रांतिकारी कंपनीचा निर्माता, आपल्या घरी कॉम्युटर दिसायला लागले ते गेट्समामा मुळे हे तर सगळ्यांना ठाऊक आहे. कित्येक वर्ष जगातला श्रीमंत माणूस म्हणून तो एक नंबरला राहिला. या साठी त्याने पण हजार भानगडी केली असतीलच, नाही असं नाही. कोणाची तरी आयडिया चोरली, कोणाला दगा दिला असं आपण खूप काही वाचत देखील असतो.
पण गेट्स मामा आपल्या पैसे कमवण्यासाठी करोडो लोकांना मारणारा रोग शोधून काढेल हे सांगूनही पटत नाही.
विशेषतः आता जेव्हा तो मायक्रोसॉफ्ट मधून रिटायर झालाय. तो आपल बिल गेट्स आणि मेलिंडा गेट्स फाऊंडेशन बनवून त्यातून पैसे दान करत सुटलाय. असं म्हणतात की त्याने आजवर आपली ९० % संपत्ती दान देऊन टाकली आहे.
मग असं असलं तरी त्याच्यावर हे कोरोनाचे आरोप कुठून सुरु झाले?
“येत्या काही दशकांमध्ये जर जगातली कोट्यवधी माणसे मेली तर त्याच कारण हे युद्ध नसून एखादा जीवघेण्या आजाराची साथ असणार आहे.”