303 खासदारांसह जगात एक नंबर झालेल्या पक्षाचे पहिले दोन खासदार कोण होते माहित आहे का?
२ खासदारांपासून सुरू झालेला पक्ष आज भारतातला सर्वात मोठ्ठा पक्ष आहे. 1984 साली भारतीय जनता पक्षाचे २ खासदार निवडून आले होते. त्यानंतरच्या 1989 च्या निवडणूकीत हा आकडा 85 वर पोहचला.
1991 साली 129
1996 साली 161
1998 साली 182
1999 साली 182
2004 साली 138
2009 साली 116
2014 साली 282
आणि
2019 साली हा आकडा तीनशे च्या पार गेला…
१९८० साली स्थापन करण्यात आलेल्या भाजपला आपलं लोकसभा सदस्यत्वाचं खातं उघडण्यासाठी १९८४ पर्यंत वाट बघावी लागली होती.
१९८४ सालच्या लोकसभा निवडणुकीत पक्षाला फक्त २ जागाच जिंकता आल्या होत्या.
या २ खासदारांपासून सुरू झालेला भाजपचा राजकीय प्रवासात २०१४ च्या लोकसभा निवडणुकीत २८२ जागा मिळवून स्वबळावर सत्ता हस्तगत करण्या इतपत मजल भाजपने मारली. २०१९ च्या निवडणूकीत हा आकडा ३०३ इतका झाला.
आज ‘माहितीच्या अधिकारात’ जाणून घेऊयात कोण होते हे भाजपचे १९८४ साली सर्वप्रथम निवडून असलेले २ खासदार.
कोण होते हे खासदार…?
माझी पंतप्रधान इंदिरा गांधी यांच्या हत्येनंतर देशात १९८४ सालची लोकसभा निवडणूक पार पडली होती. या निवडणुकीत सत्ताधारी काँग्रेस पक्षाच्या इंदिरा गांधींच्या हत्येनंतर देशात उसळलेल्या सहानुभूतीच्या लाटेचा मोठाच फायदा झाला होता आणि न भूतो न भविष्यती आशा लोकसभेच्या ४२६ जागांवर विजय मिळवत राजीव गांधी देशाच्या पंतप्रधानपदी विराजमान झाले होते.
या सहानुभूतीच्या लाटेत देखील भाजपकडून निवडून आलेले २ खासदार म्हणजे गुजरातमधील डॉ. ए.के. पटेल आणि आंध्र प्रदेशातील चंदूपाटला जंगा रेड्डी हे होत.
१) डॉ. ए.के. पटेल.
गुजरातमधील मेहसाना मतदारसंघातून डॉ. ए.के. पटेल हे निवडून आले होते. त्यांनी काँग्रेसच्या रायांका सागरभाई कल्याणभाई यांचा ४३ हजार ८९६ मतांनी पराभव केला होता.
१९८४ साली निवडून आल्यानंतर लोकसभेच्या पुढच्या ४ निवडणुकांमध्ये ए.के. पटेल यांनी या जागेवरून सलगपणे विजय मिळवला आणि १९९९ पर्यंत ते लोकसभेत या मतदारसंघाचे प्रतिनिधी राहिले.
१९९८ साली त्यांनी अटल बिहारी वाजपेयी यांच्या पंतप्रधानपदाच्या कारकिर्दीत केंद्रीय राज्यमंत्री म्हणून देखील काम पाहिलं. २००० ते २००६ या काळात ते राज्यसभेचे सदस्य राहिले.
व्यवसायाने डॉक्टर असलेले पटेल हे १९७५ ते १९८४ या काळात गुजरात विधानसभेचे सदस्य देखील होते.
२) चंदूपटला जंगा रेड्डी.
आंध्रप्रदेश मधील हनामकोंडा लोकसभा मतदासंघातून आंध्रप्रदेशचे माजी मुख्यमंत्री राहिलेल्या आणि पुढे चालून देशाचे पंतप्रधानपद भूषविलेल्या काँगेसच्या पी.व्ही. नरसिंह राव यांचा ५४ हजार १९८ मतांनी दणदणीत पराभव करत चंदूपटला जंगा रेड्डी यांनी या जागेवर भगवा फडकविण्याची किमया घडवून आणली होती.
त्यापूर्वी ते ३ वेळा आंध्रप्रदेश विधानसभेचे सदस्य राहिले होते. राष्ट्रीय स्वयंसेवक संघाचे सक्रिय कार्यकर्ते म्हणून त्यांनी आपली कारकीर्द सुरू केली होती.
हे ही वाचा.
- मोदींप्रमाणेच बेनझीर भुट्टो आणि बच्चनला देखील करण थापर यांनी घाम फोडला होता.
- दस का दम : संघाने केलेली ती 10 कामे ज्यांची प्रशंसा त्यांच्या विरोधकांनी पण केलेली आहे !
- ज्याला पाकिस्तानात पाठवायचं होतं, त्यालाच भाजपने खासदार केलं..!!!