भाजपने चौकशीची मागणी केलीय, पण अजित पवार आणि अनिल परब यांच्यावर आरोप काय आहेत?

By टिम बोलभिडू On Jun 30, 2021

भाजपचे प्रदेशाध्यक्ष चंद्रकांत पाटील यांनी आज केंद्रीय गृहमंत्री अमित शाह यांना पत्र लिहिलं आहे. या पत्रात त्यांनी,

महाविकास आघाडी सरकारमधील उपमुख्यमंत्री अजित पवार आणि परिवहन मंत्री अनिल परब यांच्याविरोधात सचिन वाझे याच्या पत्रात मोठ्या प्रमाणात वसुलीचे आरोप आहेत. हे आरोप अत्यंत गंभीर आणि लज्जास्पद आहेत. त्यामुळे सीबीआयतर्फे या प्रकरणाची सखोल चौकशी करण्यासाठी आपण आदेश द्यावेत अशी विनंती.

Disclosures made by Mumbai Police ASI Sachin Waze regarding involvement of Ajit Pawar, Anil Parab & associates in large scale corruption are shocking & shameful. Through a letter, I have urged Union Home Minister Sh. Amit Shah ji to order a CBI enquiry against both ministers. pic.twitter.com/tKgeJkoVTv

— Chandrakant Patil (@ChDadaPatil) June 30, 2021

याआधी देखील या दोन्ही मंत्र्यांची सीबीआय चौकशी करावी म्हणून २४ जून रोजी भाजपच्या कार्यकारणीत ठरावं संमत करण्यात आला होता. भ्रष्टाचाराचे प्रकरण उघड झाल्यानंतर त्यानुसार कारवाई करण्याच्या जागी हा भ्रष्टाचार उघड करणाऱ्यांनाच आरोपीच्या पिंजऱ्यात उभं करण्याचा धक्कादायक प्रकार सध्या सरकारमध्ये सुरु आहे, असं देखील या ठरावात म्हटलं होतं.

आता या दोन्ही गोष्टींमुळे अजित पवार आणि अनिल परब यांच्या अडचणी वाढणार असल्याच्या चर्चा सध्या सुरु आहेत. त्यामुळे आता पुढे काय होणार हे बघणं महत्वाच असणारचं आहे.

मात्र याच सगळ्या घडामोडींच्या पार्श्वभूमीवर या दोन्ही मंत्र्यांवर सचिन वाझेने नेमके काय आरोप केले होते ते बघावं लागले.

७ एप्रिल २०२१ रोजी कोठडीत असताना निलंबित पोलीस अधिकार सचिन वाझेने एनआयएला स्वतःच्या हस्ताक्षरांमध्ये एक पत्र लिहिलं होतं. ज्यात त्याने उपमुख्यमंत्री अजित पवार यांच्यासह तत्कालीन गृहमंत्री अनिल देशमुख आणि राज्याचे सध्याचे परिवहन मंत्री अनिल परब यांच्यावर खंडणी मागितल्याचा आरोप केला होता.

या पत्रात अजित पवार यांच्यावर पुढील प्रमाणे आरोप होते,

नोव्हेंबर २०२० मध्ये दर्शन घोडावत नावाच्या एका व्यक्तीने माझ्याशी संपर्क साधला आणि त्याने स्वतःची ओळख उपमुख्यमंत्री अजित पवार यांचा अत्यंत निकटवर्तीय आहे, अशी करून दिली. दर्शन घोडावत यांनी मला महाराष्ट्रात सुरू असलेल्या बेकायदेशीर गुटखा आणि तंबाखू व्यापार याबद्दलची सविस्तर माहिती दिली आणि सोबत अनेक फोन नंबर देखील पुरवले.

तसेच दर्शन घोडावत यांनी मला आग्रह केला की,

या बेकायदा गुटखा व्यापाऱ्यांकडून मी महिन्याला १०० कोटी रुपये जमा करावेत. मात्र अशा कोणत्याही बेकायदेशीर कृत्याला मी स्पष्ट शब्दांत नकार दिला. त्यावेळी दर्शन घोडावत यांनी मला तू आमचे ऐकले नाही तर तुझी नोकरी गमावून बसशील असा धमकी वजा इशारा देखील दिला होता.

पण त्यानंतर देखील २०२१ च्या पहिल्या दिवसापासून मी मुंबईतल्या अवैध गुटखा व्यापाऱ्यांवर जोरदार कारवाई सुरू केली. यात कोट्यवधीचा बेकायदेशीर गुटखा जप्त केला, आणि गुटखा कारखान्यांच्या मालकांवर देखील कारवाई सुरू केली.

आजी आणि भावी मुख्यमंत्र्यांना हरवणारा माणूस केव्ही रमणा…

Dec 3, 2023

ओबीसीनंतर आता भाजपचा आदिवासी मतांवर डोळा..

Nov 18, 2023

यामुळे रागावलेले दर्शन घोडावत माझ्या ऑफिसला आले आणि या सगळ्या कारवाईमुळे उपमुख्यमंत्री अजित पवार नाराज असल्याचा निरोप मला दिला. त्यानंतर त्यांनी मला या उत्पादकांना किंवा थेट उपमुख्यमंत्र्यांना भेटण्याचा सल्ला दिला. पण मी घोडावत यांची ही गोष्ट ऐकण्यास स्पष्टपणे नकार दिला.

परिवहन मंत्री अनिल परब यांच्यावर केलेले आरोप काय आहेत?

जुलै-ऑगस्ट २०२० मध्ये परिवहन मंत्री अनिल परब यांनी मला त्यांच्या शासकीय बंगल्यावर बोलावलं होतं. डीसीपींच्या बदल्या होण्याच्या तीन-चार दिवसांपूर्वीची ही गोष्ट आहे. सुरूवातीला त्यांनी SBUT प्रकरणांच्या तक्रारीची चौकशी करण्यास सांगितलं. त्यानंतर विश्वस्तांना घेऊन येण्यास सांगितलं होतं.

त्याचबरोबर ही चौकशी जर थांबवायची असेल, फाईल बंद करायची असेल तर SBUT च्या ट्रस्टींकडून ५० कोटी रुपये खंडणी जमा करण्यास सांगितले होते.

मात्र हे काम करण्यास आपण पुन्हा असमर्थता दर्शवली. कारण आपल्याला SBUT बद्दल माहिती नव्हती. त्याचबरोबर चौकशीवरही आपल कोणतंही नियंत्रण नव्हतं, असं वाझे यांनी या पत्रात म्हटलं होतं.

यानंतर वाझे यांनी अनिल परब यांच्यावर दुसरा आरोप केला की,

जानेवारी २०२१ मध्ये मंत्री अनिल परब यांनी आपल्याला पुन्हा एकदा शासकीय बंगल्यावर बोलावलं. यावेळी त्यांनी मुंबई महापालिकेच्या यादीतील काही काँट्रॅक्टर्सची चौकशी करण्यास सांगितलं.

अशा ५० काँट्रॅक्टर्सकडून त्यांनी २ कोटी रुपये वसूल करण्यास त्यांनी सांगितलं होतं.

त्याप्रमाणे अज्ञात तक्रारींच्या आधारावर या प्रकरणाची चौकशी सुरू होती. मात्र काँट्रॅक्टर्स विरोधातील तक्रारींचं क्राईम इंटेलिजन्स विभागाने केलेल्या तपासातून काहीही निष्पन्न झालं नाही. असे सगळे आरोप या पत्रांमध्ये करण्यात आले होते.

चंद्रकांतदादा पाटील यांच्या पत्रात काय आहे?

सध्या याच सगळया आरोपांची सीबीआय चौकशी करण्यात यावी यासाठी चंद्रकांतदादा पाटील यांनी आज केंद्रीय गृहमंत्री अमित शहा यांना पत्र लिहिलं आहे. या पत्रात ते म्हणतात,

महाराष्ट्रातील शिवसेना, राष्ट्रवादी काँग्रेस आणि काँग्रेस या तीन पक्षांचे सरकार हे वसुली सरकार झाले आहे. त्यामुळे इथली कायदा आणि सुव्यवस्था पूर्णपणे कोलमडली आहे. बेकायदेशीरपणे पैसे वसुली हाच सरकारचा कारभार आहे

सचिन वाझे सहाय्यक पोलीस निरीक्षक म्हणून काम करत होते. २००४ मध्ये त्यांचं निलंबन केलं होतं.२०२० मध्ये त्यांच्याबाबत मत चांगलं नसून देखील त्यांना पुन्हा सेवेत घेण्यात आलं. सध्या त्याचं वाझेला एनआयएने मुकेश अंबानी यांच्या घराबाहेर सापडलेल्या स्फोटक आणि मनसुख हिरेन यांच्या हत्येप्रकरणी अटक केली आहे. वाझे सध्या कोठडीत आहेत.

चौकशीदरम्यान सचिन वाझेने इतर गुन्हे देखील उघडकीस आणले आहेत.

एप्रिल २०२१ रोजी एनआयएच्या न्यायालयात सचिन वाझेने स्वतःच्या हस्ताक्षरात एक खुलासा सादर केला आहे. त्यात त्याने माजी गृहमंत्री अनिल देशमुख यांच्याबरोबर झालेली सविस्तर चर्चा, सोबतच उपमुख्यमंत्री अजित पवार यांच्यावर दर्शन घोडावतमार्फत अवैध गुटखा विक्रेत्यांकडून आणि उत्पादकांकडून बेकायदेशीरपणे १०० कोटी रूपये गोळा करण्यास सांगितल्याचा आरोप केला आहे.

परिवहन मंत्री अनिल परब यांनीही वाझे यांना मुंबई महापालिकेच्या ५० कंत्राटदाराकडून प्रत्येकी दोन कोटी रुपये वसूल करण्यास सांगितले, तसेच SBUT ट्रस्ट विरोधात चौकशी करण्यास सांगितलं होतं. त्यांना त्रास देऊन ५० कोटी जमा करण्यास सांगितलं होतं.

याच सगळया आरोपांमुळे अजित पवार, अनिल परब आणि दर्शन घोडावत यांची सीबीआय चौकशी करण्यात यावी. ही तक्रार कोणत्याही राजकीय अजेंड्यासाठी नसून महाराष्ट्रातील जनतेचा कायद्यावरील विश्वास उडत चालला आहे. याची गृहमंत्र्यांनी दखल घ्यावी. अशी विनंती शहा यांना केली आहे.

मात्र आता या विनंतीवरून अमित शहा काय भूमिका घेतात हे बघणं महत्वाचं ठरणार आहे, यात मग आता सीबीआय चौकशीचे आदेश देऊन अजित पवार आणि अनिल परब यांची अडचण वाढवणार कि पत्र वाचून बाजूला ठेऊन देणार, नक्की काय करणार हे येणाऱ्या काही दिवसात स्पष्ट होईल.

हे हि वाच भिडू.