२२ ठाकुरांच्या हत्येचा बदला घेण्यासाठी ज्याने फुलनदेवीला मारलं त्याच्यावरच आता पिक्चर येतोय

“बीहड़ में बागी होते हैं, डकैत मिलते हैं पार्लिमेंट में” हा डायलॉग ऐकला असेलच…

चंबळ खोरं अन डाकू यांचं जुनं नातं तुम्हाला माहितीच आहे. याही पेक्षा आणखी एक नातं म्हणजे पिक्चर अन दरोडेखोरांचं. यातले काही पिक्चर तर तुम्हाला आठवणीत राहतीलच.. ते म्हणजे ‘द बैंडिट क्वीन’ आणि ‘पान सिंह तोमर’….पण आता तुम्हाला अपग्रेड राहायला लागेल कारण याच यादीत आणखी एका पिक्चरची भर पडणारे…जरी या पिक्चरचं नाव नाही ठरलं पण थोडक्यात पिक्चर शेर सिंग राणावर असेल…तोच शेर सिंग राणा जो फुलनदेवीला गोळ्या घालून तिची हत्या केली होती….आता फुलंदेवीची स्टोरी आपण पिक्चरमध्ये पहिली आता राणाची स्टोरीकाय कोणत्या पिक्चरच्या स्टोरी पेक्षा कमी नाहीये, हि स्टोरी आपल्याला लवकरच पडद्यावर दिसणार आहे. 

तुम्हाला फुलंदेवीच्या संघर्षमय आयुष्याचा इतिहास तर माहितीच आहे. वयाच्या १० व्या वर्षी तिने स्वतःच्या काकांवर केलेला हल्ला, त्यानंतर तिचं लहान वयात ५० वर्षाच्या म्हणताऱ्याशी लावून दिलेलं लग्न. त्यानंतर तिच्या नवऱ्याने तिच्यावर कित्येक वर्ष केलेले बलात्कार. शेवटी खंगून खंगून ती माहेराला आसरा घ्यायला येते अन माहेरच्यांनी परत तिला सासरी पाठवलं. तोपर्यंत नवऱ्याने दुसरं लग्न केलं होतं. अन तिला घरातून काढून टाकलं. त्यानंतर तिची काही डाकूंसोबत झालेली मैत्री आणि नंतर ती स्वतः डाकूंची राणी बनली.

आता मुद्द्याला हात घालते…ते म्हणजे बेह्माई हत्याकांड. या हत्याकांडाचा अन आपण बोलणार आहोत त्याचा म्हणजेच शेर सिंग राणा चा संबंध आहे…कसा ? 

आता बेह्माई हत्याकांड तर तुम्हाला माहितीच असेल. फुलन देवीने  आपल्यावर झालेल्या अन्यायाचा बदला घेत तिने बेह्माई येथील २२ ठाकुरांची हत्या केली केली होती. मल्लह (नाविक) समुदायातून येणारी फुलन देवी या प्रकारानंतर चंबळमधील ‘रॉबिनहूड लेडी’ म्हणून ओळखण्यात येऊ लागली.  फुलन देवीच्या मनात ठाकूर (राजपूत ) समुदायावर असलेल्या रागाला अनेक कारणं होती यातील एक महत्वाचं कारण म्हणजे फुलन देवीची टोळी आणि ठाकूर टोळीच्या भांडणात फुलनचा विनयभंग झाला होता. एका ठाकूर टोळीतल्या डाकुने तिला विकत घेतलं होतं तर दुसऱ्या एका ठाकूर टोळीतील डाकुने तीला गावभर विवस्त्र फिरवलं होतं. याच रागातून तीने ठाकुरांची हत्या केली होती.

पुढे उत्तर प्रदेशातील अर्जुन सिंग सरकारने फुलन देवीच्या अनेक अटी आणि शर्ती मान्य करत तीचं आत्मसमर्पण घडवून आणलं. नंतर फुलनदेवी सक्रीय राजकारणात आली आणि समाजवादी पक्षाच्या तिकिटावर निवडणूक लढवत खासदार देखील झाली. त्यानंतर बँडीट क्वीन’ नावाचं पुस्तक अन पिक्चर देखील आलेला. 

त्यानंतर तिने केलेलं लग्न असेल किंव्हा तिच्या राजकीय कारकिर्दीत ती अनेकदा बातम्यांमधून झळकत असायची. 

अन २००१ सालात जुलै महिन्यात अनपेक्षित बातमी आली. 

२५ जुलै २००२ रोजी खासदार फुलन देवीची दिल्लीतील सरकारी निवासस्थानी अज्ञातांनी गोळ्या घालून  हत्या केली होती.  या घटनेच्या दोनच दिवसानंतर एक शेर सिंग राणा नावाच्या ऐन तिशीतल्या युवकाने पत्रकार परिषद घेऊन फुलन देवीच्या हत्येची कबुली देत डेहराडून पोलिसांसमोर आत्मसमर्पण केलं. त्याच्या चौकशीदरम्यान बेह्माई येथील ठाकुरांच्या हत्येचा बदला घेण्यासाठी आपण फुलन देवीची हत्या केल्याचं त्याने पोलिसांना सांगितलं. त्यानंतर शेर सिंग राणा याला तिहार जेलमध्ये ठेवण्यात आलं.

खरं तर शेर सिंग राणा दोनदा चर्चेत आला. पहिल्यांदा जेंव्हा त्याने फुलनदेवीला गोळ्या घालून हत्या केयी तेंव्हा आणि दुसऱ्यांदा जेंव्हा त्याची रवानगी तुरुंगात झाली होती अन त्याने फिल्मी स्टाईल मध्ये जेलमधून पळून गेलेला.  हाय सिक्युरिटी तुरुंगातून पळून गेल्याने तो चर्चेत आला होता. 

चार्ल्स शोभराज याच्यानंतर फिल्मी स्टाईलने पळून जाणारा तो दुसरा माणूस होता.

हि २००४ ची घटना आहे, त्याने चक्क तिहारमधून धूम ठोकली होती. तिहारमधून पळून गेल्यानंतर तो थेट अफगाणिस्तानात गेला होता. त्यानंतर २००६ साली त्याला कोलकात्यात पकडण्यात आलं. त्यावेळी आपण पृथ्वीराज चौहान यांच्या अस्थी भारतात आणण्यासाठी काबुलला गेलो असल्याचं त्याने माध्यमांशी बोलताना सांगितलं होतं. विशेष म्हणजे हे अवशेष भारतात आणून उत्तर प्रदेशात पृथ्वीराज चौहान यांचं मंदिर बांधण्याचा चंग त्याने बांधला होता. 

पळून जाण्यापासून ते काबुल आणि परत भारतात येईपर्यंतच्या अशा सर्वच घडामोडींचं त्याने व्हिडीओ शूट देखील केलं होतं. १७ मी २००६ रोजी कोलकाता येथे अटक झाल्यानंतर त्याला परत तिहारमध्ये पाठविण्यात आलं. दिल्लीच्या ट्रायल कोर्टाने १४ ऑगस्ट २०१४ रोजी फुलन देवीच्या हत्येप्रकरणी शेर सिंगला जन्मठेपेची शिक्षा सुनावली होती. त्याच दिल्ली उच्च न्यायालयाने राणा यांना अंतरिम सार्वमत दिले. तर २०१२ मध्ये तर त्याने यूपीच्या जेवर विधानसभेतून स्वतंत्र विधानसभा निवडणूक लढवली होती.

खटल्यादरम्यानच्या काळात त्याने  “जेल डायरी- तिहार से कंदहार तक” नावाचं पुस्तक लिहिलं. याच पुस्तकावर आधारित “एंड ऑफ़ बैंडिट क्वीन” नावाचा चित्रपट येणार असल्याची मध्यंतरी चर्चा होती. ज्यात शेर सिंग राणाची भूमिका नवाजुद्दिन सिद्धिकी साकारणार असल्याच्या बातम्या येत होत्या पण त्याचं पुढे काय झालं माहिती नाही पण सद्याच्या चर्चेत असणारी गोष्ट म्हणजे त्याच्यावरच पिक्चर येणार असल्याची. 

२९ ऑक्टोबर २०२१ रोजी निर्माता विनोद भानुशाली आणि दिग्दर्शक श्री नारायण सिंह या जोडीने  शेरसिंग राणा यांच्या जीवनावर आधारित बायोपिकची घोषणा केली होती. 

एक हत्यारा असलेल्या शेर सिंगवर बायोपिक का येत असेल ? तर वर सांगितल्याप्रमाणे शेरसिंग राणाने लहान वयातच अनेक कारणांमुळे संपूर्ण भारतात खळबळ उडवून दिली होती. याशिवाय आणखी एक कारण म्हणजे ज्यामुळे तो राजपूत समाजात त्याला खूप मानतात. 

ते म्हणजे, अफगाणिस्तानमधील कंदाहारमधून चौहान घराण्याचा ११ व्या शतकातील शासक पृथ्वीराज चौहान यांच्या खुणा परत आणण्यासाठी शेर सिंग जगभरात चर्चेत आला होता. एका महान शासकाचे अवशेष परत आणणारी एकमेव व्यक्ती म्हणून राजपूत समाजात त्याला खूप आदर दिला जातो. 

शेरसिंग राणा यांच्या जीवनावर आधारित असलेल्या या चित्रपटाचे निर्माते लवकरच कलाकारांची घोषणा करतील आणि या वर्षी हा चित्रपट बनवला जाईल असं सांगण्यात येतंय. या बायोपिकची निर्मिती विनोद भानुशाली, कमलेश भानुशाली, विशाल गुरनानी, विशाल त्यागी, मोहम्मद इम्रान खान यांनी केली असून जुही पारेख मेहता सहनिर्माते आहेत. भानुशाली स्टुडिओ लिमिटेड सोबत हा चित्रपट मटर पेट्रोल फिल्म्सच्या बॅनरखाली बनवला जाणार आहे.

हे हि वाच भिडू :

• जेआरडी टाटा नव्हे तर पुरुषोत्तम मेघजी कबाली हे भारतीय वंशाचे पहिले परवानाधारक पायलट होते
  
• जुलमी दुनियेच्या छाताडावर पाय देऊन गौहर जान देशातल्या पहिली करोडपती गायिका बनल्या
  
• रथ यात्रा अडवल्यानं लालूंची हवा झाली, मात्र सरकार वाचवायला ११ चे ६९ मंत्री करावे लागले