केरळात भाजपचा पहिला आमदार सलग ९ पराभव पचवून तयार झाला होता….

By टिम बोलभिडू On Mar 24, 2021

पश्चिम बंगाल, केरळ आणि तामिळनाडू ही तीन राज्य म्हणजे भाजपची दुखरी नस. आजवर कधीही न जिंकता आलेले गड. एका बाजूला दिल्ली सलग दुसऱ्यांदा जिंकली तरी या तीन पैकी एकही गड अद्याप हाती आलेला नाही. त्यातही पश्चिम बंगाल आणि तामिळनाडूमध्ये थोडं तरी अस्तितव असल्याचं पाहायला मिळतं. पण केरळमध्ये परिस्थिती पूर्ण निराळी.

तिथं आपलं अस्तित्व तयार करण्यासाठी भाजपला तब्बल ९ पराभव पचवावे लागले होते. त्यानंतर २०१६ साली तिथं भाजपचा पहिला निवडून आला होता, आणि विशेष गोष्ट म्हणजे ते राज्यातील भाजपचे एकमेव होते.

या आमदारांच नाव म्हणजे ओलांचेरी राजगोपाल.

अटलबिहारी वाजपेयी पंतप्रधान असताना त्यांच्या मंत्रिमंडळात केंद्रीय मंत्री राहिलेले राजगोपाल यांची गोष्ट पक्ष बाजूला ठेऊन बघितली तर पक्षांतर करणाऱ्या आमदार-कार्यकर्त्यांना पण प्रेरणा देणारी आहे.

९ वेळा हरलेल्या माणसाच्या पहिल्या विजयाची गोष्ट…..

१९२९ रोजी केरळच्या पालक्काड जिल्ह्यात जन्मलेल्या राजगोपाल यांनी आपलं शाळा, कॉलेजच शिक्षण पूर्ण करून मद्रासचा (आताच चेन्नई) रस्ता धरला. तिथं कायद्याचं शिक्षण घेऊन १९५६ मध्ये पालक्काड न्यायालयात प्रॅक्टिस चालू केली. याच दरम्यान ते जनसंघाचे संस्थापक दीनदयाळ उपाध्यय यांच्या संपर्कात आले.

उपाध्याय यांच्या देशभक्तीच्या भावनेनं प्रेरित होत राजगोपाल यांनी पण राजकारणात प्रवेश केला.

जनसंघाचे सदस्य बनल्यानंतर त्यांना पक्षाच्या राष्ट्रीय कार्यकारणीत सदस्य म्हणून स्थान मिळालं. १९६४ ते १९६७ पर्यंत ते या पदावर होते. पुढे जनसंघाच्या राज्य युनिटचे अध्यक्षपद राजगोपाल यांना देण्यात आले. अद्याप देखील ते निवडणुकीच्या रिंगणात उतरले नव्हते.

पुढे जनता पक्षात जनसंघाच विलीनीकरण झाल्यानंतर त्यांना पक्षाचं राज्य महासचिव बनवण्या आलं. याच पक्षातून त्यांचा निवडणुकीच्या राजकारणाचा प्रवास चालू झाला.

१९८० मध्ये त्यांनी जनता पक्षाचा उमेदवार म्हणून कासारगोडमधून पहिल्यांदा लोकसभेची निवडणूक लढवली. पण पहिल्यांदाच पराभव झाला.

जनता पक्ष फुटून भाजप बनल्यानंतर त्यांना केरळचे प्रदेशाध्यक्ष बनवण्यात आले. जवळपास १९८५ पर्यंत ते या पदावर होते. त्यानंतर १९८९ ला मंजेरीतून मतदार संघातून त्यांनी लोकसभा लढले, निकाल पराभूत.

आजी आणि भावी मुख्यमंत्र्यांना हरवणारा माणूस केव्ही रमणा…

Dec 3, 2023

ओबीसीनंतर आता भाजपचा आदिवासी मतांवर डोळा..

Nov 18, 2023

पुढे १९९२ साली त्यांना मध्यप्रदेशमधून राज्यसभेवर पाठवण्यात आलं. त्यानंतर १९९८ ला त्यांना पुन्हा राज्यसभेवर संधी देण्यात आली.

मात्र १९९९ मध्ये त्यांनी तिरुअनंतपुरममधून लोकसभा लढवण्याचा निर्णय घेतला, पुन्हा लढले, पुन्हा हरले. पण अगदी लाखात मत घेतली होती. १,५८,२२१. या आधी भाजपाच्या उमेदवाराला त्याच जागेवरून ९४,३०३ आणि ७४,९०९ अशी मत मिळाली होती.

१९९९ ला अटलबिहारी वाजपेयींचं सरकार आल्यानंतर त्यांना केंद्रीय राज्यमंत्री बनवण्यात आलं. यात संरक्षण, संसदीय कार्य, रेल्वे, नगरविकास, कायदा व न्याय अशी महत्वाची खाती होती.

पुढे २००४ मध्ये पुन्हा तिरुअनंतपुरममधूनच त्यांनी लोकसभा लढली. या वेळी देखील ते पराभूत झाले, पण तब्बल २, २८,०५२ अशी भरगोस मत घेऊन. त्यानंतर २००६ ला पालक्काड आणि २०११ मध्ये नेमममधून विधानसभा लढले, दोन्ही वेळा पराभव

२०१२ मध्ये नेयाट्टींकारमधून पोटनिवडणूक लढले, तिथेही हरले पण आधीच्या ६,७३० मतांना ३०,५०७ वर नेऊन. म्हणजे तब्बल पाचपट मत वाढवून. २०१४ ला ते तिरुअनंतपुरममधून पुन्हा लोकसभा लढले. यावेळी समोर होते शशी थरूर, आणि देशात होती मोदी लाट. कधीही न ऐकलेली नाव लोकसभेला निवडून आली होती. पण राजगोपाल पुन्हा हरले.

राजगोपालांना थरूर समोर असताना थोडी नाही तर २,२८,३३६ मत मिळाली होती. त्यांच्यातील पराभवाच अंतर होतं १५ हजारच.

२०१५ अरुविक्कर मधली पोटनिवडणूक लढले. हि निवडणूक देखील हरले. मात्र हा त्यांचा ९ वा आणि शेवटचा पराभव होता. कारण पहिला विजय त्यांची वाट बघत होता.

२०१६ ची विधानसभा ते पुन्हा नेमम मधून लढले. हा निकाल राजगोपालांच्या बाजूने होता. तिथले विद्यमान आमदार सिवनकुट्टींचा त्यांनी ८,६७१ मतांनी पराभव केला होता, आणि भाजपच्या पहिल्या लोकप्रतिनिधीने केरळची विधानसभा गाठली, यावेळी राजगोपाल यांचं वय होतं ८७ वर्ष.

सध्या त्यांचं वय ९२ आहे, पण या वयात देखील त्यांचा एवढे पराभव बघून राज्यात पक्षाची अवस्था माहित असून देखील उत्साह मात्र तसूभर देखील कमी झालेलं नाही. आणि सगळ्यात महत्वाचं म्हणजे त्यांनी इतक्या वर्षात ९ पराभव बघून देखील पक्ष सोडला नव्हता हे विशेष….

हे हि वाच भिडू.