रामदास पाध्येंनी ससा आणला आणि ‘लिज्जत पापड’ लोकप्रिय झाला

जसं जेवणात चवीपुरतं मीठ गरजेचं असतं तसंच खुपदा तोंडी लावायला पापड असेल तर आणखी बहार येते. उन्हाळ्यात बहुतेक प्रत्येक माणसाच्या घरी पापड बनवले जातात. पण सध्याच्या धावपळीच्या जगात अनेक लोकं बाहेरुन रेडीमेड पापड आणुन घरी तळतात. पापड उद्योगातली सर्वात लोकप्रिय कंपनी म्हणजे ‘लिज्जत पापड’.

आजही चारचौघांच्या घरी डोकावलं तर लिज्जत पापडाचं पॅकीट हे हमखास दिसेल. आज घरोघरी लिज्जत पापड लोकप्रिय होण्यामागे एका मराठी माणसाच्या कल्पक बुद्धीचं योगदान आहे.

हा मराठी माणुस म्हणजे भारतातले प्रतिभावंत लोकप्रिय शब्दभ्रमकार रामदास पाध्ये.

१९५९ दरम्यानची गोष्ट. सात गुजराती महिलांच्या डोक्यातुन पापड बनवुन ते विकण्याची कल्पना आली. गिरगाव येथे एका बिल्डिंगच्या गच्चीवर त्यांनी पापड बनवले. सुरुवातीला मुंबईतल्या भुलेश्वरला जिथे मोठा बाजार भरतो, तिथे पापडाची चार पाकीटं या महिला विकण्यासाठी घेऊन गेल्या.

हळुहळु त्यांचा हा व्यवसाय मोठा होत गेला. १९६२ साली ‘श्री महिला गृह उद्योग’ यांच्या या पापड उद्योगाला ‘लिज्जत’ हे नाव ठेवले गेले. तीन-चार वर्षातच ‘लिज्जत’ची वार्षिक उलाढाल १ लाख ८२ हजार इतकी होती. पुढे ‘लिज्जत’ ने अनेक महिलांना रोजगाराची संधी निर्माण केली.

‘लिज्जत’ ने अधिकाधिक लोकांपर्यंत पोहोचण्यासाठी दूरदर्शनवर १९८० साली जाहिरात बनवण्याचा निर्णय घेतला.

याच दरम्यान एक मराठी माणुस एका अनोख्या कलेची ओळख भारताला करुन देत होता. हा माणुस म्हणजे शब्दभ्रमकार रामदास पाध्ये. रामदास पाध्ये भारत आणि जगभरात त्यांच्या बाहुल्यांसह शब्दभ्रमाचे प्रयोग करत होते.

रामदास पाध्येंना ‘लिज्जत’ ने जाहिरातीसाठी बोलावले. अर्धवटराव हा पाध्येंचा बाहुला प्रचंड लोकप्रिय. त्यामुळे अर्धवटरावाला घेऊन पाध्येंनी ‘लिज्जत’ची जाहिरात करावी, अशी अपेक्षा होती. परंतु रामदास पाध्येंनी अर्धवटरावांऐवजी ‘लिज्जत’साठी खास गोजीरवाणा ससा बनवला.

‘लिज्जत’ समूहाला पाध्ये अर्धवटरावाऐवजी ससा का घेऊन आले, हे कळालं नाही. तेव्हा पाध्ये सर्वांना म्हणाले

“तुमचा पापड इतका चविष्ट आहे की माणसांसोबत ससा सुद्धा हा पापड आवडीने खातो.”

पाध्येंची हि कल्पना ‘लिज्जत’ समूहाला आवडली.

‘लिज्जत’ च्या जाहिरातीसाठी जिंगल बनवण्यात आली. शब्द वगैरे उत्तम होते परंतु पाध्येंना शेवटी काहीतरी पंच लाईन असण्याची आवश्यकता भासली. तेव्हा पंचलाईनसाठी सश्याचाच आवाज वापरावा, असं पाध्येंना वाटलं.

पुढे मग १० दिवस त्यांनी सश्याचा हसण्याचा आवाज काढण्याचा प्रयत्न केला. पण मनासारखा आवाज होत नव्हता. दहा दिवस सश्याचा हसण्याचा आवाज काढता काढता पाध्ये अक्षरशः रडकुंडीला आले होते. आणि मग ११ व्या दिवशी पाध्येंना मनासारखा आवाज सापडला.

दूरदर्शन साठी १९८० साली ‘लिज्जत’ ची जाहिरात शूट करण्यात आली.

पाध्येंचा ससा संपुर्ण जाहिरातीत भाव खाऊन गेला. जाहिरातीच्या शेवटी लिज्जत पापड असं बोलुन ससा हसतो. पाध्येंचा हा ससा आणि त्याचं हसणं जाहिरातीसाठी इतकं चपखल बसलं, की त्यानंतर लिज्जत पापड घरोघरी लोकप्रिय झाला. हि जाहिरात सुद्धा कित्येक लोकांच्या मनात घर करुन आहे.

तुम्ही आजही लिज्जत पापड खरेदी केलात तर पापडाच्या पाकीटावर सश्याचं चित्र पाहायला मिळतं.

रामदास पाध्येंची ओळख वेगळी सांगायची गरज नाही. गेली ५० पेक्षा जास्त वर्ष रामदास पाध्ये शब्दभ्रमाचे विलक्षण प्रयोग करत जगभरात या कलेचा प्रसार करत आहेत. रामदास पाध्येंची पत्नी अपर्णा, मुलं सत्तजित- परिक्षीत आणि सुनेची सुद्धा पाध्येंना त्यांच्या या प्रयोगात मोलाची साथ असते. रामदास पाध्येंनी पुढे लिज्जत पापडासह आमीर खानच्या ‘टाटा स्काय’ च्या जाहिरातीसाठी सुद्धा अशीच कल्पना राबवली होती.

हे ही वाच भिडू.

• ७ बायकांनी ८० रुपये उसने घेतले आणि सुरू झाला लिज्जत पापडचा प्रवास !
• भारतातली पहिली फेअरनेस क्रीम ज्याची जाहिरात खुद्द महात्मा गांधींनी केली होती.
• कोका कोलाला देशाबाहेर घालवून जॉर्ज फर्नांडिस यांनी सरकारी कोला आणला होता.