राजेश पायलट देखील काँग्रेसवर नाराज होते पण पक्ष कधी सोडला नाही..

राजस्थानच्या राजकारणात मागच्या वर्षी झालेली फितुरी पुन्हा उद्भवण्याची चिन्ह दिसू लागली आहेत. मुख्यमंत्री अशोक गेहलोत यांचा टांगा पलटी करून सचिन पायलट हे काहीतरी खतरनाक करण्याच्या मनस्थितीत असल्याचं दिसून येतंय. महत्वाचं पद न मिळाल्यानं काँग्रेसमधील धुसफूस कायम दिसून येते. सचिन पायलट पक्ष त्यागतात कि नुसत्या सोडून जाण्याच्या धमक्या देतात ह्याविषयी तर्क लावले जाताय.

सचिन पायलट यांच्यावर फितुरी केल्याचा आरोप काही नवीन नाही , आताच्या घडीला ते पक्ष सोडतात कि दुसऱ्या पक्षात जाणार किंवा नवीन पक्ष स्थापन करणार अशा वावड्या उठत आहे. आमदारांच्या भेटीगाठी घेऊन ते नवीन काहीतरी बॉम्ब फोडण्याच्या तयारीत असल्याचं दिसतंय. 

सचिन पायलट यांचे वडील मात्र काँग्रेस पक्षात मनाविरुद्ध काम झालं तर काँग्रेसची गोची करायचे मात्र कधी पक्ष सोडून गेले नाहीत.

प्रसंगी पक्षाला धारेवर धरलं पण पक्ष त्यागण्याच्या गोष्टी केल्या नाहीत याबाबतीत त्यांचा एक प्रसिद्ध किस्सा आहे जो आपण आज जाणून घेणार आहोत.

सचिन पायलट यांचे वडील राजेश पायलट हे पूर्णवेळ काँग्रेसमध्ये राहिले आणि पक्षातल्या वरिष्ठ लोकांच्या हेव्यादाव्यांना वैतागून त्यांनी आपली जादूही दाखवली. ज्यामुळे काँग्रेस त्यांच्या अशा प्रकरणांमुळे गोत्यात सापडलं होतं. सत्तेसाठी चालणाऱ्या खेळात लोक जनसेवा विसरुंज गेले आहेत असं त्यांना कायम वाटायचं.

१९९७ साली काँग्रेस पक्षाच्या अध्यक्ष पदासाठी निवडणूक घेण्यात आली होती. राजेश पायलट यांनी सीताराम केसरी यांच्या विरोधात हि निवडणूक लढवली होती, काँग्रेस पक्षाचा हा सगळ्यात वाईट काळ होता. गांधी परिवार हळूहळू खुर्चीपासून दूर चालला होता आणि इतर लोकांची खुर्चीवर नजर वाढत चालली होती. त्यावेळी पार्टीच्या अध्यक्ष पदासाठी राजेश पायलट, सीताराम केसरी आणि शरद पवार यांच्यात हि निवडणूक झाली होती.

सीताराम केसरी यांनी राजेश पायलट आणि शरद पवार या दोघांना मात देत अध्यक्षपद पटकावलं. पायलट हे मिळालेल्या पराभवामुळे नाराज झाले आणि पुन्हा पक्षात अंतर वाढू लागलं. आता या सगळ्यांचं संगनमत करण्यासाठी पुन्हा गांधी परिवारचं पुढे आला. सोनिया गांधी १९९८ साली काँग्रेस पक्षात आल्या आणि अध्यक्ष झाल्या. 

सोनिया गांधी अध्यक्ष झाल्याने पुन्हा त्या विदेशी असल्याचा मुद्दा उपस्थित झाला. या मुद्द्यामुळे शरद पवार, पीए संगमा आणि तारिक अनवर अशा मोठ्या नेत्यांनी काँग्रेसला जबर धक्का देत पार्टी सोडून दिली. हा काँग्रेसला खूप मोठा धक्का होता.

पण या सगळ्यांपेक्षा वेगळे राजेश पायलट होते. ते पक्ष सोडून जाणार असल्याचं वातावरण जरी निर्माण झालं होतं तरी ते पक्ष सोडून गेले नाही.

मात्र राजेश पायलट यांच्या दहशतीमुळे ते खरंच काँग्रेस सोडून गेले तर पक्षावर काय वेळ येईल अशा चर्चा झडत होत्या.

पण राजेश पायलट यांनी आपली ताकद दाखवली खरी पण ते पक्ष सोडून काय गेले नाही. त्यांनी ना गांधी परिवाराला सोडलं आणि ना काँग्रेस सोडून दुसऱ्या पक्षात गेले.

राजस्थानच्या राजकारणात राजेश पायलट हे खूप महत्वाचं नाव होतं. केंद्रीय मंत्री पदही त्यांनी भूषविलं होतं. राजीव गांधींसोबत त्यांचे अगदी घनिष्ठ संबंध होते. ज्यावेळी ते भेटत तेव्हा वायू सेनेवर कायम चर्चा करत असत.  पुढे सचिन पायलट आणि राहुल गांधी यांचेही मैत्रीपूर्ण संबंध वाढले.

पण आताची परिस्थिती बघता सचिन पायलट यांचं हे बंड राजस्थानमध्ये काँग्रेस पक्षाला भूमिगत करतं कि नुसती हूल देतं हे पाहणं इंटरेस्टिंग आहे. 

हे हि वाच भिडू :

Leave A Reply

Your email address will not be published.