एक मात्र झालं, मामूच्या खुराड्यातल्या चार कोंबड्या तेवढ्या फस्त झाल्या… 

राजकारणात बऱ्याचदा हलकेफुलके, साधे सरळ किस्से घडतात. काही केल्या हे किस्से विसरता येत नाहीत. अगदी छोट्या छोट्या गोष्टी देखील पुन्हा नव्याने मांडल्या जातात.

हा किस्सा देखील असाच. किस्सा तसा खूप साधा, पण तो शरद पवारांच्या देखील जसाच्या तसा लक्षात आहे. 

एके ठिकाणी शरद पवारांनी अगदी आठवणीने हा किस्सा सांगितला होता. 

शरद पवार अर्थातच महाराष्ट्रातल्या प्रत्येक जिल्ह्यात गेलेले आहेत. पवारांची अनेक आवडीची ठिकाणे आहेत त्यातलच एक ठिकाण म्हणजे कोकणातलं वेंगुर्ला. ब्रिटीशकाळातला डाकबंगला. तिन्ही बाजूंनी समुद्र. छोटेखाली डाकबंगल्याच्या समोर बसायला विस्तिर्ण असा चौक. अस वैंगुर्ल्याचं वर्णन शरद पवार करतात. 

शरद पवार सांगतात की, 

वेंगुर्ल्यातील अनेक स्थानिक लोकांशी माझा घरोबा. वेगुर्ल्याच्या दौऱ्यात आम्ही रात्ररात्रभर त्यांना जमवून गप्पा मारत बसायचो. मला हे गाव आवडत कारण इथे मुंबईहून निवृत्त झालेली मंडळी स्थायिक झाली आहे. सोबत सोळाव्या वर्षाच्या आतल्यांची देखील इथे संख्या आहे. मात्र कर्ते सवरते सगळे मुंबईला.  

एकदा राज्याच्या कृषीमंत्री म्हणून शरद पवार त्यांच्यासोबत केंद्रातील राज्यमंत्री अण्णासाहेब शिंदे, राज्यातील राज्यमंत्री नानासाहेब सपकाळ व सोबत उपमंत्री असणारे यवतमाळचे अली हसन ममदानी अशा चार मंत्र्यांनी वेंगुर्ल्यांचा दौरा आखला होता. 

या दौऱ्यामध्ये कोकणात विशेषकरुन वेंगुर्ल्यात आंब्याच क्षेत्र वाढवण्याची मोहीम हातात घेण्यात आली होती.  या संबधित या चार मंत्र्यांचा दौरा आखण्यात आला होता. नेहमीप्रमाणे चारही मंत्र्यांचा दौरा वेंगुर्ल्यात उतरला होता.

या दौऱ्याच्या आठवणीबाबत शरद पवार सांगतात,  

झुंजूमुंजू झाल्यावर सवयीप्रमाणे मी लुंगी गुंडाळून समुद्रकिनाऱ्यावर चक्कर टाकायला निघालो. एका अड्ड्यावरून जात असताना माझ्या कानावर पुसटशी चर्चा आली. ती बहुधा आम्हा चौघांबद्दलचीच होती. मी चालण्याचा वेग थोडा कमी केला.

मी त्यांचं बोलणं कान देऊन ऐकू लागलो, तर एकजण सांगत होता : 

‘‘कळलं का रे तुला ? आपल्या वेंगुर्ल्यात साडेतीन मंत्री आलेत…’’

दुसऱ्यानं विचारलं,

‘‘साडेतीन कसे रे?’’

पहिल्यानं सांगितलं,

‘‘केंद्रातून शिंदे, महाराष्ट्राचा पवार, विदर्भाचा सपकाळ आणि उपमंत्री ममदानी… मग झाले ना साडेतीन? तीन फुल आणि तो उपमंत्री म्हणून अर्धा!’’ 

त्यातल्या एकानं विचारलं,

‘‘एवढे आलेत? मग त्यांनी काही योजनाबिजना आणली काय आपल्यासाठी?’’ 

त्यावर वडीलधाऱ्यानं उत्तर दिलं,

‘‘अरे, हे सगळे शिंचे काँग्रेसचे मंत्री ! ते काय योजना आणणार कोकणासाठी? एक मात्र झालं, मामूच्या खुराड्यातल्या चार कोंबड्या तेवढ्या फस्त झाल्या!’’ 

आमच्याबद्दलचं हे भाष्य ऐकून मी निमूटपणे पुढच्या रस्त्याला लागलो…!

हे ही वाच भिडू 

•  पुलोदचं मुख्यमंत्रीपद शरद पवारांना नाही तर बापूंना मिळणार होतं..
• शरद पवारांचे सासरे सदाशिव शिंदे यांच्या नावाने क्रिकेटमध्ये असाही एक अचाट विक्रम आहे
• शरद पवारांपासून ते सुशिलकुमार, भाई वैद्य, राम नाईक…. सर्वांनी मिळून फसवलं ?