अंबानींना जीवे मारण्याची धमकी आलीये पण त्यांची सुरक्षा व्यवस्थाही तेवढीचं तगडी आहे

देशातला दुसऱ्या क्रमांकाचे श्रीमंत व्यक्ती मुकेश अंबानी आहेत. त्यांच्या प्रत्येक गोष्टी मिडिया आणि सोशल मिडीयावर कायम चर्चेत असतात. मग त्यांचं घर अँटीलिया असो वा लंडनमधील स्टोक होम असो…

मात्र मुकेश अंबानी पुन्हा एकदा चर्चेत येण्याचे कारण म्हणजे त्यांच्या कुटुंबियांना जीवे मारण्याची धमकी देण्यात आली आहे. धमकी देणाऱ्याने ३ तासात कुटुंबाला मारण्याची धमकी दिली आहे. रिलायन्स फाउंडेशन हॉस्पिटलच्या फोन नंबरवर ४ ते ५ वेळा धमकी देणारा फोन आला होता. या प्रकरणी रुग्णालय प्रशासनाने डीबी मार्ग पोलिसांना याबद्दल माहिती दिली आहे.

मुकेश अंबानी यांच्या कुटुंबियांना धमकी दिल्याने त्यांच्या कुटुंबियांची सुरक्षा कशी आहे. कुठली यंत्रणा त्यांना सुरक्षा पुरविते हे पाहूयात…

मध्यंतरी अशी चर्चा होती कि, मुकेश अंबानींना इस्त्रायलची यंत्रणा सुरक्षा पुरविते. त्यांच्या सुरक्षेसाठी इस्त्रायलची लोकं आहेत. आपल्याला माहितीच आहे कि, इस्त्रायलची यंत्रणा  काय आहे आणि कशी काम करते. तर त्यांना जी पोलीस सुरक्षा आहे ती मध्य प्रदेश सरकारची आहे, असंही एकंदरीत म्हणलं जातं.  त्यांच्या रोजच्या ताफ्यात सहा सात रेंज रोव्हर असतात अन त्यात हे पोलीस बसलेले असतात. मुकेश अंबानी ज्या भागात राहतात त्या रोडवर एखादा व्यक्ती जरी दोनदा गेला तरी त्याची चौकशी होते.  

 मुंबईत राहणाऱ्या या उद्योगपतीला मध्य प्रदेश पोलीस यंत्रणा सुरक्षा का पुरविते हा प्रश्नच आहे..याबाबत स्पष्टीकरण देणारी माहिती किंव्हा बातम्या कुठेही उपलब्ध नाहीत. मागे जेंव्हा मुकेश अंबानींच्या घराखाली स्फोटके भरलेली गाडी सापडली होती तेंव्हा मनसे प्रमुख राज ठाकरे यांनीच याचा उल्लेख केलेला कि, अंबानी यांना मध्य प्रदेश सरकार सुरक्षा पुरवते.   

त्यांनी तेंव्हा प्रश्न उपस्थित केलेला कि, मुंबईतील माणसाला मध्य प्रदेश सुरक्षा का पुरविते हे समजलेले नाही?

असो या निमित्ताने असो अगर लोकांची उत्सुकता म्हणून आपण याची माहिती घेऊया कि माबानी यांची सुरक्षा यंत्रणा कशी काम करते ?

रिलायन्स इंडस्ट्रीजचे मालक मुकेश अंबानी यांना भारत सरकारने Z+ सुरक्षा दिलेली आहे. ते २४ तास  Z+ सुरक्षा कवचमध्ये असतात. तर त्यांच्या पत्नी नीती अंबानी यांना y+ सुरक्षा आहे. त्यांचा स्वतःचा बंगलाही एखाद्या किल्ल्यापेक्षा कमी नाही, जिथे नेहमीच खाजगी सुरक्षारक्षक तैनात असतात. 

भारतात Z+ सुरक्षा हि सगळ्यात मजबूत सुरक्षा समजली जाते. राष्ट्रपती, पंतप्रधान आणि देशातील महत्वाच्या व्यक्तींना ही Z+ सुरक्षा पुरविली जाते. म्हणजेच  हे सुरक्षा कवच किती महत्त्वाचे आहे याचा अंदाज लावा.

एकूण ५० ते ५५ सुरक्षा कर्मचार्‍यांचा लवाजमा अंबानींसोबत कायम असतो.

मुकेश अंबानींच्या सुरक्षेसाठी सीआरपीएफ मधील  ५० ते ५५ उच्च प्रशिक्षित सुरक्षा कर्मचारी २४ तास सोबत असतात. गरज असेल तर कव्हरमध्ये राष्ट्रीय सुरक्षा रक्षक NSG चे किमान १० कमांडो असतात. त्यांच्या याच सुरक्षा दला मध्ये केंद्रीय राखीव पोलीस दलाचे जवान असतात म्हणजेच CRPF वर अंबानींना VIP सुरक्षा कवचाच्या शीर्ष ‘Z+’ श्रेणी अंतर्गत सुरक्षित करण्याची जबाबदारी सोपवण्यात आली आहे. मुकेश अंबानी यांच्या पत्नी नीता अंबानी यांनाही अशाच प्रकारच्या कव्हरखाली  संरक्षण दिले आहे परंतु त्यांच्याकडे ‘Y’ कव्हर सेक्युरिटी आहे. या सर्व सुरक्षा कर्मचाऱ्यांना मार्शल आर्टचे प्रशिक्षण दिले जाते. 

२०१३ पर्यंत मुकेश अंबानी यांना अगोदर झेड सुरक्षा देण्यात येत होती, मात्र जेंव्हापासून मोदी सरकार सत्तेत आले तेंव्हा मोदी सरकारने अंबानींची सुरक्षा वाढवून झेड प्लस केली होती. 

अंबानी जेव्हा इतर राज्यांत असतात तेव्हा संपूर्ण सुरक्षा कवच त्यांच्या सोबत असते. काही कमांडोज ला इथेच ठेवलं जातं कारण बाकीची सुरक्षा व्यवस्था संबंधित राज्य करत असते. या २४ तास सुरक्षेचा खर्च स्वतः मुकेश अंबानी यांनाच करावा लागतो.

गृह मंत्रालयाने दिलेल्या माहिती नुसार मुकेश अंबानी झेड प्लस सुरक्षेसाठी दरमहा १५ ते १६ लाख रुपये बिल भरतात. या खर्चाशिवाय सुरक्षा कर्मचाऱ्यांच्या राहण्याची आणि जेवणाची व्यवस्थाही अंबानींना करावी लागत असते.

बरं हे एव्हढी सुरक्षा सोडून देखील मुकेश अंबानी आणखी अतिरिक्त संरक्षण घेतात.

मुकेश अंबानी फक्त सरकारी सुरक्षेवर अवलंबून नसतात तर ते स्वतः एक अतिरिक्त वैयक्तिक संरक्षण देखील घेतात. यामध्ये लष्कर आणि निमलष्करी दलातील निवृत्त सैनिकांव्यतिरिक्त एनएसजीच्या रिटायर्ड जवानांचा समावेश आहे. अंबानींच्या सर्व गाड्या सशस्त्र आणि बुलेटप्रुफ आहेत. सेक्युरिटी शिवाय ते  घराबाहेर पडत नाहीत. संपूर्ण काफिला त्यांच्या समोर आणि मागे असतो.

तर त्यांच्या अँटिलियाची सेक्युरिटी प्रायव्हेट लोकांकडे आहे. 

मुकेश अंबानी यांचे मुंबईतील ‘अँटिलिया’ हवेली जगातील सर्वात महागड्या घरांपैकी एक आहे. चार लाख चौरस फुटांमध्ये पसरलेली ही बिल्डींग दक्षिण मुंबईच्या अल्टामाऊंट रोडवर आहे. या २७ मजली बिल्डींगचा प्रत्येक एक मजला सुमारे दोन मजल्यांएव्हडा आहे. त्याची रचना अशी आहे की ती रिश्टर स्केलवर ८ इतक्या तीव्रतेचा भूकंप सहजपणे सहन करू शकते. अँटिलियाची सुरक्षा खाजगी हातात आहे. खासगी सुरक्षा रक्षक येथे चोवीस तास तैनात असतात. याशिवाय मुंबई पोलिसांचे पथकही हजर असते. 

अँटिलियामध्ये तब्बल ६०० कर्मचारी तैनात आहेत. अँटिलियाच्या टेरेसवर ३ हेलिपॅड आहेत, जे केवळ अंबानी कुटुंबाच्या सोयीसाठी नाहीत तर आपत्कालीन परिस्थितीत त्वरित बाहेर पडण्यासाठी देखील म्हणून बनविण्यात आलीत. इमारतीत टोटल नऊ लिफ्ट आहेत. २७ मजल्यांपैकी सहा मजले फक्त अंबानी कुटुंबाच्या गाड्या ठेवण्यासाठी आहेत. जिम, स्पा, मल्टिपल स्विमिंग पूल, जकूझी, योगा आणि डान्स स्टुडिओ अशा सुविधांसह मनोरंजन केंद्र आहे. इमारतीच्या वरच्या मजल्यावर अंबानी कुटुंब राहते. २७ मजली इमारतीत  पर्यावरणाचा विचार करून गार्डनदेखील बनविण्यात आले आहे. 

२०१९ मध्ये अंबानी आणि त्यांच्या कुटुंबीयांना दिलेली Z+ सुरक्षा काढून टाकण्याची मागणी करणारी याचिका मुंबई उच्च न्यायालयात एक याचिका देखील दाखल करण्यात आली होती. जी कि, नंतर उच्च न्यायालयाने  फेटाळून लावली होती.  मुंबईतील अंधेरी भागात राहणारे, व्यवसायाने चार्टर्ड अकाउंटंट हिमांशू अग्रवाल यांनी ही याचिका दाखल केली होती.

अंबानी आणि त्यांच्या कुटुंबीयांना दिलेली सुरक्षा हा केंद्र तसेच राज्य सरकारवर असलेला अनावश्यक बोजा आहे आणि त्याचा परिणाम करदात्यांच्या खिशावर होत असल्याचा दावा याचिकेत करण्यात आला होता. या याचिकेत म्हटले गेलं कि, एसपीजी सुरक्षेला आणि इतर उच्चस्तरीय लोकांना धोका लक्षात घेऊन पंतप्रधानांनी अंबानींना झेड प्लस सुरक्षा दिलीये.

मुकेश अंबानी यांच्या बरोबर मुंबईत २०० लोकांना सुरक्षा पुरविली जाते.

हे ही वाच भिडू 

•  आमदारांना पळविणारी निता ट्रॅव्हल्स नेमकी कोणाच्या मालकीची ? निता अंबानी की राज ठाकरे यांची
• अदानींचे पाच बिजनेस जे अंबानींना ओव्हरटेक करण्याची त्यांची स्ट्रॅटेजी दाखवून देतात 
•  अदानींचे पाच बिजनेस जे अंबानींना ओव्हरटेक करण्याची त्यांची स्ट्रॅटेजी दाखवून देतात
•