धुळ्याच्या पोरानं घरबसल्या ६ विश्वविक्रम केलेत, घरबसल्या हे विक्रम मोडता येतात का बघा

घरबसल्या कमवा ३५,००० रुपये. घरबसल्या पापड तयार करा. भिडूंनो आम्ही तुम्हाला अस काहीही सांगणार नाही.

सध्याचा दिनक्रम म्हणजे सकाळी १० वाजता उठणे. फेसबुक उघडणे. १२ वाजता जेवण करुन वामकुशी घेणे. पाच वाजता परत अल्पोहार त्यानंतर टिव्हीवर कोरोनाचे किती आकडे वाढले हे पाहणे आणि रात्री पिक्चर पाहणे असा झालाय. यात विशेष अस काही करण्यासारखं नाहीय.

म्हणून विचार केला घरबसल्या अचाट अस काही करता येवू शकतं का? तेव्हा धुळ्याच्या या मुलाची माहिती मिळाली. त्याने आपल्या ब्लॉगवर त्याच्या विक्रमाबद्दल लिहलं आहेच.

तर या भिडूने काय केलय याच्यापुर्वी त्यांची बेसिक माहिती सांगण गरजेचं आहे.

राहिल शेख अस या पोराचं नाव. मिडलक्लास कुटूंबातला जन्म.  S.S.V.P.S कृष्णा नगर हायस्कूलमधून तर J.R. सिटी हायस्कूलमधून त्याच शिक्षण झालं. त्यानंतर उत्तर महाराष्ट्र विद्यापीठातून त्यानं शिक्षण घेतलं. त्याचा जन्म १९९३ चा. म्हणजे हा आत्ता २७ वर्षाचा पोरगा आहे. या वयात या पठ्यानं ६ विश्वविक्रमांना गवसणी घातली आहे.

आत्ता हे विक्रम काय आहेत ते बघुया.

१) सर्वात लांब लचक इ मेल आयडी तयार करणे.

माझ्या इमेल आयडीतले शब्द मी मोजले. १८ शब्द निघाले. पहिला तुम्हीपण तुमच्या इमेल आयडीतले शब्द मोजा. २०-२५ शब्दांच्या वरती गाडी सरकणार नाही. पण या भिडू्च्या इमेल आयडीत १०० शब्द आहेत.  जगातला सर्वाधिक लांबीचा इ-मेल आयडी तयार करण्याचा विक्रम या फंटरच्या नावावर आहे.

२) सर्वात लहान इ-मेल आयडी तयार करणे.

या मेल आयडीत आठ शब्द आहेत. आपण साध जी मेलच उदाहरण घ्यायचं म्हणलं तरी G MAIL . COM असे नऊ आकडे होतात. याचा मेल आयडी फक्त आठ शब्दाचा आहे.

३) लय जोरात फोल्डर तयार करणं.

न्यू फोल्डर तयार करण्यात आपल्या भिडू लोकांची खासियत असते. कुठलं मटेरियर कुठं लपवून ठेवलय हे कोणाच्या बापाला सापडू शकत नाहीत. आत्ता विचार करा एका तासात तुम्ही किती फोल्डर तयार करु शकताय? या भिडूने २४५३ फोल्डर एका तासात केलेले आहेत.

४) कॉम्प्युटर रिफ्रेश मारण्याचा प्रकार.

यात तर आपण उस्ताद आहे. गंडल की कॉम्प्युटर रिफ्रेश मारत बसायचा हा धंदा सॉफ्टेवअर इंडस्ट्रितला सर्वात भारीतला धंदा आहे. पण या पठ्याने ३० सेकंदात ५८ वेळा कॉम्प्युटर रिफ्रेश मारलाय. म्हणजे सेकंदाला दोनची सरासरी आहे. पण मला वाटतय १५ दिवसाच्या प्रॅक्टिसनंतर हा विक्रम मोडता येवू शकतोय.

५) विन्डोज बंद करणे.

२० सेकंदात ३९ मायक्रोसॉफ्ट विन्डोज क्लोज करण्याचा विक्रम या पठ्याने केलाय.

६) विन्डोज सुरू करण्याचा विक्रम.

एकाच वेळी ६० मायक्रोसॉफ्ट विन्डोज उघडण्याचा विक्रम या पठ्याने केलाय.

आत्ता या राहिल शेखचं कौतुक जगभरात असणारचं. अमेरिका, इंग्लडच्या वेगवेगळ्या रेकॉर्ड होल्डर बुकमध्ये त्याची नोंद आहे. धुळे भूषण पुरस्कारासह त्याला जगभरातले वेगवेगळे पुरस्कार मिळाले आहेत.

खाली त्यांच्या ब्लॉगची लिंक देत आहोत ती वाचा आणि ट्राय मारा. आम्हाला विश्वास आहे, एखादा भिडू तरी हा विक्रम मोडून नवे विक्रम रचेल.

हे ही वाच भिडू. 

Leave A Reply

Your email address will not be published.