खासदार संभाजीराजे मराठा आरक्षण प्रश्नातून पॉलिटिकल स्पेस तयार करतायत का?

संभाजी राजेंनी २००९ सालची लोकसभा निवडणुकीत राष्ट्रवादी कॉंग्रेसकडून लढविली. या निवडणुकीत संभाजीराजे यांचा पराभव झाला. २०११ पर्यंत ते स्थानिक राजकारणात सक्रीय होते. मात्र, त्यानंतर मात्र त्यांनी राजकारणातून फारकत घेतली होती. त्यांनी आजवर कोणतीच राजकीय भूमिका घेतली नाही. त्यांनी कधी ही कोणती पक्षीय भूमिका घेतली नाही.

मराठा आरक्षण प्रश्नावर त्यांनी पुढाकार घेतला. त्यासाठी वेळ देणं, भेटी घेणं यामुळं मराठा समाजात त्यांना मोठं स्थान मिळालं. २००७ पासून आरक्षणासाठी त्यांनी किमान २ वेळा तरी महाराष्ट्र पिंजून काढला आहे. तसंच त्यांनी समाजतल्या तरुणांची मोट बांधायला सुरुवात केली. आपले कार्यकर्ते उभे केले. त्यांच्या या मराठा आरक्षणाच्या भूमिकेतूनच त्यांची राजकीय ताकद वाढली आहे.

अशातच मराठा आरक्षण प्रश्न चिघळत असताना संभाजीराजेंनी नवा पक्ष स्थापन करण्याच्या सोशल मीडियातील चर्चांना हवा दिली होती.

खरं तर संभाजीराजेंना भाजपने राज्यसभेवर राष्ट्रपतींच्या कोट्यातून खासदार म्हणून नियुक्त केलं होतं. यानंतर संभाजीराजेंनी राज्यसभेत भाजपचं सहयोगी सदस्यत्व स्वीकारत भाजपशी जवळीक साधली होती. मात्र, भाजपने पक्षात नव्याने आलेल्या मराठा नेत्यांना पक्षात सक्रीय करीत महाराजांना बाजूला ठेवल्याचे चित्र निर्माण झालं होत.

त्यामुळे अस्वस्थ असलेल्या संभाजीराजेंच्या मनात नव्या राजकीय चाचपणीसाठी विचार सुरु आहेत अशी चर्चा सुरु असतानाच, राजे नवा पक्ष स्थापन करणार असल्याची चर्चा सोशल मीडियात सुरु झाली. त्यावर संभाजी राजे म्हंटले,

“बहुजन समाजाची इच्छा असेल तर नवा पक्ष स्थापन करण्याचा नक्की विचार करू”

त्यामुळे संभाजीराजे नवा पक्ष स्थापन करण्यासंदर्भात चाचपणी करत असल्याचे संकेत मिळाले होते.

आता महाराष्ट्रात त्यांना बहुजनांचे बळ मिळावे म्हणून वेळोवेळी आपली भूमिका मांडली. ही भूमिका घेताना ते म्हणतात,

मराठा समाजाला मुख्य प्रवाहात कस आणता येईल यासाठी मी प्रयत्न करीत आहे. शाहू आणि शिवाजी महाराज यांचा मी वंशज असल्यानं अठरा पगड जातींना एकत्र ठरवण्याची माझी जबाबदारी आहे.

आणि म्हणूनच संभाजी राजे आणि प्रकाश आंबेडकर यांच्या भेटीनंतर राज्याच्या राजकारणात मोठी खळबळ उडाली होती. याच भेटीनंतर चर्चा सुरु झाली ती म्हणजे राजे आता मराठा आरक्षणावरुन आता थेट बहुजनांच्या राजकारणावर शिफ्ट होतायत.

मराठा आरक्षणाच्या प्रश्नावरून खासदार छत्रपती संभाजी राजे यांनी वंचित बहुजन आघाडीचे अध्यक्ष प्रकाश आंबेडकर यांची भेट घेतली. भविष्यात हे दोन्ही नेते सोबत येणार या विचारांना बळ मिळण्याचं कारण म्हणजे भेटीनंतरची पत्रकार परिषद. या पत्रकार परिषदेत आंबेडकर म्हंटले की,

राज्यसत्तेशिवाय आरक्षणाचा प्रश्न सुटणार नाही.

म्हणजे राजेंनी सत्तेत सहभागी झालं पाहिजे असा त्याचा अर्थ निघतो.

याच पत्रकार परिषदेत दोन्ही नेत्यांनी एकमेकांवर स्तुती सूमने उधळली. याबरोबरच भविष्यात सोबत काम करण्याचे संकेत देत नव्या राजकीय आघाडीचे सुतोवाचही केले. 

२००९ च्या पराभवानंतर संभाजी राजेंनी स्वतःला जाणीवपूर्वक राजकारणापासून लांब ठेवलं. त्यांनी महाराष्ट्रातल्या जनेतच्या प्रश्नांकडे लक्ष केंद्रित केलं. त्यात कालच त्यांचं ‘जाब विचारायचा असेल तर मला मुख्यमंत्री करा’ हे वक्तव्य. यावरुन संभाजी राजेंच्या राजकीय आकांक्षांना राजकीय धुमारे फुटत असल्याचं चित्र निर्माण होत आहे.

शाहू महाराजांचे थेट वंशज, मराठा क्रांती मोर्चातील सक्रीय सहभाग, साधेपणा आणि संयमी नेतृत्व अशी संभाजीराजेंची ओळख राज्यभरात आहे. पक्षीय राजकारणात दुभागलेल्या घटकांना संभाजी राजे राजकारणापासून तटस्थ आहेत हा विश्वास मिळवून देण्यात ते यशस्वी झाले. त्यामुळे आताशा राजकीय वक्तव्य करून पुढच्या राजकीय वाटचालीसाठी ते लिटमस टेस्ट करत असल्याची शक्यता नाकारता येत नाही.