आता शिंदेंसोबत युती करणाऱ्या, जोगेंद्र कवाडे यांनी हाजी मस्तानसोबत पक्ष सुरू केला होता…

‘अरे मरणाची भिती कुणाला आहे? हम तो कफन लेके घुमते है’ असं म्हणून प्राध्यापक जोगेंद्र कवाडे आपल्या सभेतल्या भाषणाला सुरूवात करतात. त्यांनी आज मुख्यमंत्री एकनाथ शिंदे यांच्या सोबत संयुक्त पत्रकार परिषद घेतली आणि युतीची घोषणा केली.

प्रा. कवाडे म्हणजे आंदोलनांमधून समोर आलेला आणि मोठा झालेला चेहरा.

सध्या राजकारणात सक्रीय दिसत असले किंवा सर्वसामान्यांना ते एक राजकारणी म्हणून परिचीत असले तरीही प्राध्यापक, अर्थतज्ज्ञ, पत्रकार, राजकारणी आणि समाजसेवक इतक्या क्षेत्रात काम करणारा हा माणूस.

सामाजिक, राजकीय, शिक्षण क्षेत्रात काम करत असलेले जोगेंद्र कवाडे यांना सगळे जण कवाडे सर म्हणून ओळखतात

त्याचं कारण असंय की, कवाडेंनी एम. कॉम पूर्ण केल्यानंतर काही काळ शिक्षण क्षेत्रात काम केलं. प्राध्यापक म्हणून त्यांनी नोकरी केली. ही नोकरी करत असतानाच त्यांचं सामाजिक आणि राजकीय क्षेत्रातलंही काम सुरूच होतं.

अनेक सामाजिक चळवळींमध्ये, आंदोलनांमध्ये कवाडे यांनी मोठी भुमिका बजावलीये.

मराठवाडा विद्यापीठ नामांतराच्या आंदोलनात ते सहभागी होते.

मराठवाडा विद्यापीठ नामांतराच्या आंदोलनाचा ज्या ज्या वेळी इतिहास सांगितला जातो तेव्हा प्रा. कवाडे यांचं नाव सर्वात आधी घेतलं जातं. त्याचं कारण म्हणजे, या आंदोलनात विशेष लक्षवेधी ठरलेला तो लाँग मार्च. याच लाँग मार्चचे प्रणेते म्हणून कवाडे यांच्याकडे पाहिलं जातं.

त्यांच्या या आंदोलनामुळे तत्कालीन राज्य सरकारला त्यांची दखल घ्यावी लागली होती.

१९७६ मध्ये सामाजिक उठावामुळे तुरूंगवास भोगला होता.

१९७६ मध्ये जेव्हा नवबौद्ध समाजातील नागरिकांच्या सवलतींसाठी आंदोलन केलं होतं. त्या आंदोलनानंतर त्यांना तिहार जेलमध्ये दहा दिवसांचा कारावास भोगावा लागला होता.

प्रा. जोगेंद्र कवाडे यांनी दलित, वंचित, आदिवासी आणि मागास महिलावर्गासाठी काम केलंय. याशिवाय विद्यार्थ्यांचे प्रश्न सोडवण्यासाठीही ते नेहमीच सक्रिय होते. विद्यार्थ्यांच्या आंदोलनाचा एक बुलंद आवाज म्हणूनही त्यांची ओळख आहे

ही आणि अशी अनेक आंदोलनं, चळवळी त्यांनी केल्या. त्यातलं सगळ्यात गाजलेलं आणि ज्या आंदोलनाने त्यांना ओळख मिळवून दिली ते म्हणजे मराठवाडा विद्यापीठाच्या नामांतराचं आंदोलन.