ब्रीचकॅन्डीत ॲडमिट झालेले वाजपेयी मिडीयाला म्हणाले, “जेवढा आजारी आहे तेवढचं छापा.”

काल राष्ट्रवादी कॉंग्रेसचे अध्यक्ष शरद पवार यांना मुंबईच्या ब्रीचकॅन्डी हॉस्पिटल दाखलं केल्याची बातमी आली. सोबतचं उद्या म्हणजे बुधवारी त्यांच्यावर शस्त्रक्रिया देखील होणार आहे. पण ही नुसती एकच बातमी देवून पत्रकार शांत झाले का? तर आजिबात नाही.

यात मग पत्रकारांनी शरद पवारांना नक्की काय आजार झाला? आजार झालेल्या अवयवाचं काम काय असतं?, ऑपरेशन कधी होणार आहे, त्यात रिस्क किती आहे वगैरे वगैरे बातम्या दिवसभर द्यायला सुरुवात केली. आज सगळीकडे वृत्तपत्रांमध्ये पण या बातम्या अगदी पहिल्या पानावर छापून आल्या आहेत.

कालपासून देशाच्या पंतप्रधानांपासून ते अगदी मुख्यमंत्री, आमदार, कार्यकर्ते अशा सगळ्यांकडून फोन करुन, ट्विट करुन शरद पवार यांच्या प्रकृतीची विचारपूस केली जात आहे.

मात्र बातम्यांच्या बाबतीत अशीच एक वेळ एकदा देशाचे पंतप्रधान असताना अटलबिहारी वाजपेयी यांच्यावर देखील आली होती. त्यावेळी पण स्थळ होतं मुंबईचं ब्रीचकॅन्डी हॉस्पिटल.

त्याचं झालेलं असं की,

२००० सालच्या जुलै-ऑगस्टच्या दरम्यान पंतप्रधान अटलबिहारी वाजपेयी यांना गुडघ्यांचा त्रास चालू झाला होता. तपासणी केल्यानंतर ‘ऑस्टियोआर्थरिटीस’ नामक आजार समोर आला. त्यावर डॉक्टरांनी  त्यांना ऑपरेशन करण्याचा सल्ला दिला.

झालं यानंतर माध्यमांमधून आजच्या सारख्याच बातम्या प्रसारित व्हायला लागल्या. त्यावेळी इंडिया टुडे, झी न्युज, डेक्कन हेरॉल्ड अशा सगळ्या आघाडीच्या माध्यम समुहांनी देशाच्या पंतप्रधानांची बातमी म्हणून स्पेशल स्टोरी केल्या. या स्टोरींमध्ये नेमकं काय झालयं? हे ऑपरेशन कसं होणार? कोण करणार? अशा सगळ्या गोष्टींबद्दल अगदी पहिल्या पानावर माहिती छापून आली.

सोबतचं यासंबंधी वृत्तपत्रांमध्ये रोज वेगवेगळ्या बातम्या छापून येत होत्या.

अटल बिहारी वाजपेयींना या ऑपरेशनसाठी भारताबाहेर जायचं नव्हतं. त्यामुळे अमेरिकेतील भारतीय वंशाचे अस्थिरोग तज्ञ डॉक्टर चित्तरंजन राणावत यांना भारतात पाचारण करण्यात आलं. सप्टेंबर २००० मध्ये पंतप्रधानांना मुंबईच्या ब्रीचकॅन्डीमध्ये दाखलं करण्यात आलं.

त्यावेळी हॉस्पिटलमध्ये जाण्याआधी वाजपेयींनी थांबून पत्रकारांशी संवाद साधला. एव्हाना त्यांनी छापून आलेल्या सगळ्या बातम्या वाचल्या होत्या. बोलण्याची सुरुवात करतानाच वाजपेयी आपला वर्ल्ड फेमस पॉज घेत हसत म्हणाले,

महोदय, एक बिनती है आपसे.

“जितना बीमार हूं, उतना ही लिखिए, न कम न ज्यादा”

वाजपेयींचं हे वाक्य ऐकून सगळे पत्रकार गडगडाटी हसायला लागले. त्यानंतर ब्रीचकॅन्डीमध्ये त्यांच्या उजव्या गुडघ्याचं ऑपरेशन झालं. त्याचं वेळी वाजपेयींना डाव्या गुडघ्याच ऑपरेशन करण्याचा सल्ला देखील देण्यात आला होता. पुढे २००१ मध्ये त्यांच्या डाव्या गुडघ्याच देखील ऑपरेशन करण्यात आलं.

थोडक्यात ब्रीच कॅन्डी हॉस्पिटल आणि डॉ. चित्तरंजन राणावत यांच्या मुळे अटलबिहारी वाजपेयी पुन्हा आपल्या दोन्ही पायावर उभं राहू शकले असं म्हंटल्यास वावगं ठरणार नाही.

हे ही वाच भिडू.

• या एका अटीवर वाजपेयी चक्क काँग्रेसला पाठिंबा द्यायला तयार झाले होते
• त्याकाळात चर्चा सुरु होती की वाजपेयी भाजप सोडणार आहेत ?
• काही वेळातच विमान क्रॅश होवू शकत हे माहित असूनही वाजपेयी झोपून राहिले कारण.