या प्रमुख २१ जणांनी उद्धव ठाकरेंची अखेरपर्यंत साथ दिली…

सर्वोच्च न्यायालयानं राज्यपालांनी दिलेले बहुमत चाचणीचे आदेश कायम ठेवले आणि काही मिनिटांतच उद्धव ठाकरेंनी फेसबुक लाईव्हद्वारे जनतेशी संवाद साधला आणि मुख्यमंत्रीपदाचा राजीनामा देत असल्याची घोषणा केली. 

यावेळच्या भाषणात ते म्हणाले, ‘ज्यांना सगळं काही दिलं ते नाराज झाले आणि ज्यांना काहीच दिलं नाही ते आत्ताही सोबत आहेत.’ अर्थातच त्यांचा रोख बंडखोर आमदारांवर होता.  

जेव्हा शिवसेनेत बंडखोरी झाली, आमदार सुरतला गेले. त्यादिवशी सगळ्यात पहिला आकडा कानावर आला होता १२ आमदार आणि सत्तानाट्याचा अंक संपला तेव्हा शिवसेनेच्या बंडखोर आमदारांची संख्या होती ३९.

या भाषणात उद्धव ठाकरे असंही म्हणाले की, ‘आजच्या कॅबिनेट बैठकीत मी, आदित्य, अनिल परब आणि सुभाष देसाई हे शिवसेनेचे चारच मंत्री होतो. बाकीचे मंत्री कुठे आहेत, हे तुम्ही जाणताच.’

थोडक्यात आमदार आणि संधी दिलेले मंत्रीही बंड करुन शिवसेनेपासून लांब गेले. मग प्रश्न पडतो, की उद्धव ठाकरेंसोबत अखेरपर्यंत राहिलं तरी कोण ? बंडाचं पेव फुटलेलं असताना या २१ जणांनी उद्धव ठाकरेंची साथ न सोडण्यामागं नेमकी कारणं काय आहेत ?

१) आदित्य ठाकरे –

या प्रश्नाचं सगळ्यात साहजिक उत्तर म्हणजे आदित्य ठाकरे. युवासेना प्रमुख असलेले आदित्य हे मुख्यमंत्री उद्धव ठाकरे यांचे सुपुत्र आहेत. पाहिल्याच आमदारकीत त्यांना मंत्रिपद मिळालं, पण त्याही पलीकडे ‘ठाकरे’ असण्याची नैतिक जबाबदारी त्यांच्यावर आहेच.

२) सुनील राऊत –

नैतिकतेचं दडपण असणारं दुसरं नाव म्हणजे सुनील राऊत. विक्रोळीतून सलग दुसऱ्यांदा आमदार झालेले सुनील राऊत हे शिवसेना खासदार संजय राऊत यांचे बंधू. आपले बंधू शिवसेनेचा किल्ला लढवत असताना, बंडखोर आमदार बंडखोरीसाठी संजय राऊत यांना जबाबदार धरत असताना सुनील राऊत यांनी उद्धव ठाकरेंसोबतच राहणं स्वाभाविक आहे.

३) नितीन देशमुख –

एकनाथ शिंदे बंडखोर आमदारांसोबत सुरतला गेल्यानंतर चर्चेत आलेलं पहिलं नाव होतं, ते म्हणजे नितीन देशमुख. त्यांच्या पत्नीनं देशमुख बेपत्ता असल्याची तक्रार केली होती. त्यात त्यांना हार्ट अटॅक आल्याची बातमीही आली. मात्र दोनच दिवसांनी देशमुख राज्यात परतले.

त्यांनी आपल्याला जबरदस्ती तिकडे नेल्याचा, अटॅक आल्याचा बनाव रचल्याचा आरोप केला. पत्रकार परिषदेत त्यांनी आपण उद्धव ठाकरेंसोबतच असल्याचं जाहीर केलं. देशमुख हे अकोल्यातल्या बाळापूर मतदारसंघाचे आमदार असून, ही त्यांची आमदारकीची पहिलीच टर्म आहे.

४) कैलास पाटील –

उस्मानाबादचे कैलास पाटीलही २०१९ मध्ये पहिल्यांदा आमदार झाले. शिंदे गटातले आमदार सुरतला जात असताना, आपण लघुशंकेचं कारण सांगून तिथून सुटका करुन घेतली आणि कधी चालत, तर कधी ट्र्कमधून मुंबई गाठली आणि उद्धव ठाकरेंना भेटलो आणि आता त्यांच्यासोबतच राहणार आहोत, असं कैलास पाटील यांनी सांगितलेलं.

५) संतोष बांगर –

हिंगोलीतल्या कळमनुरी मतदारसंघाचे आमदार संतोष बांगर यांची ही पहिलीच टर्म. २०१७ मध्ये त्यांना हिंगोलीचे जिल्हाप्रमुख म्हणून जबाबदारी मिळाली आणि २०१९ मध्ये त्यांनी विधानसभेत धडक मारली. संतोष बांगर यांनी हिंगोलीत बंडखोर आमदारांविरोधात आक्रमक भूमिका घेतली होती.

बांगर यांचं फेसबुक प्रोफाईल पाहिलं, तर १८ मे लाच त्यांची आणि उद्धव ठाकरेंची भेट झाल्याचं, सद्यस्थितीत बरंच बोलकं असणारं छायाचित्र पाहायला मिळतं.

६) राहुल पाटील –

सोमवारी दुपारी एक बातमी आली होती, ती म्हणजे परभणीचे आमदार राहुल पाटील गुवाहाटीला जाणार. मात्र काही तासांनीच खुद्द राहुल पाटील यांनीच या बातमीचं खंडन केलं होतं.

१९९० पासून परभणीत शिवसेनेचं वर्चस्व आहे. परभणीतून पाटील यांनी सलग दुसऱ्यांदा शिवसेनेच्या तिकिटावर निवडणूक जिंकली आहे. २०१४ च्या निवडणुकीत त्यांनी एमआयएमच्या उमेदवाराला हरवलं होतं, तर २०१९ मध्ये वंचित बहुजन आघाडीच्या उमेदवारचा मोठा मताधिक्यानं पराभव केला होता.

७) अजय चौधरी –

एकनाथ शिंदेंच्या बंडानंतर लगोलग चर्चेत आलेली काही नावं होती, त्यात अजय चौधरी यांचं नाव होतं. शिवसेनेनं एकनाथ शिंदेंवर पहिली कारवाई केली, ती म्हणजे त्यांना गटनेतेपदावरुन हटवण्यात आलं आणि त्यांच्या जागी अजय चौधरी यांची नियुक्ती झाली.

२०१४ मध्ये चौधरी शिवडी मतदारसंघातून निवडून गेले, या यशाची पुनरावृत्ती त्यांनी २०१९ मध्येही केली. विभागप्रमुख पदापासून सुरुवात करणारे चौधरी हे उद्धव ठाकरे यांचे कट्टर समर्थक म्हणून ओळखले जातात.

८) सुनील प्रभू –

मुंबईचे माजी महापौर असणारे सुनील प्रभू, शिवसेनेचे निष्ठावान म्हणून ओळखले जातात. शिवसेना खासदार गजानन कीर्तिकर यांचे खाजगी सचिव म्हणून राजकीय प्रवास सुरू करणाऱ्या प्रभू यांना शिवसेनेनं नगरसेवकपदाची संधी दिली. ४ वेळा नगरसेवक झाल्यानंतर, त्यांनी मुंबईच्या महापौरपदापर्यंत मजल मारली.

२०१४ मध्ये दिंडोशी मतदारसंघातून ते आमदार झाले आणि २०१९ मध्ये त्यांनी ४४ हजारांपेक्षा जास्त मतांनी विजय मिळवला. 

९) उदयसिंग राजपुत –

कन्नडचे आमदार उदयसिंग राजपुत यांचं शिवसेनेसोबत असलेलं नातं तसं इंटरेस्टिंग आहे. कन्नडमधून ते २००४ ला अपक्ष म्हणून लढले आणि अवघ्या २ हजार मतांनी त्यांचा पराभव झाला. २००९ मध्ये पुन्हा अपक्ष म्हणून लढले आणि यावेळी ४ हजार मतांनी पराभव झाला. २००९ मध्ये बाजी मारलेली मनसे आमदार हर्षवर्धन जाधव यांनी.

२०१४ मध्ये हर्षवर्धन जाधव यांना शिवसेनेनं तिकीट दिलं, तर राजपुत यांनी राष्ट्रवादीचा झेंडा हाती घेतला. या निवडणुकीत राजपूत फक्त दीड हजार मतांनी पराभूत झाले. २०१९ मध्ये त्यांना शिवसेनेनं संधी दिली आणि आपल्या चौथ्या प्रयत्नात त्यांनी अपक्ष हर्षवर्धन जाधवांचा १९ हजार मतांनी पराभव करत यश मिळवलंच.

बंडखोरीच्या चर्चा सुरू असताना, त्यांनी उद्धव ठाकरेंना किमान १५ वेळा वर्षावर भेटलो, त्यांच्यामुळेच विधानसभेत जायची संधी मिळाली, असं वक्तव्य केलं होतं.

१०) रमेश कोरगावकर –

भांडुप वेस्ट या शिवसेनेच्या पूर्वापारच्या बालेकिल्ल्यातून निवडून आलेलय रमेश कोरगावकर यांची आमदारकीची ही पहिलीच टर्म आहे. २००२ मध्ये पहिल्यांदा त्यांनी मुंबई महानगरपालिकेत नगरसेवक म्हणून प्रवेश केला होता. ४ वेळा नगरसेवक म्हणून निवडून गेल्यानंतर कोरगावकर यांना २०१९ च्या निवडणुकीत आमदारकीची संधी मिळाली आणि ती त्यांनी गाजवली.

११) रवींद्र वायकर –

उद्धव ठाकरेंच्या निकटवर्तीयांपैकी एक नाव म्हणजे जोगेश्वरी ईस्टचे आमदार रवींद्र वायकर. फडणवीस सरकारमध्ये राज्यमंत्री पदाची जबाबदारी पार पाडलेले वायकर सलग तिसऱ्यांदा आमदार म्हणून निवडून आले आहेत.

१९९२ मध्ये ते पहिल्यांदा मुंबई महानगर पालिकेत नगरसेवक म्हणून धडक मारलेली. त्यानंतर ४ वेळा नगरसेवक, एकदा स्थायी समितीची अध्यक्षपद भुषवल्यानंतर २००९ मध्ये ते पहिल्यांदा आमदार झाले. 

विशेष म्हणजे, डिसेंबर २०२१ मध्ये ईडीनं वायकर यांची तब्बल ८ तास चौकशीही केली होती. तरीही ते उद्धव ठाकरेंसोबतच आहेत.

१२) संजय पोतनीस –

कलिनाचे आमदार असलेल्या संजय पोतनीस यांची ही दुसरी टर्म. दोन्ही वेळेस पोतनीस हे थोड्या मतफरकानं निवडून आले. २००७ मध्ये नगरसेवक झाल्यानंतर २०११ पर्यंत त्यांनी बेस्टचे चेअरमन म्हणून काम पाहिलं. त्यानंतर २०१४ आणि २०१९ ला ते आमदार म्हणून निवडून आले.

१३) प्रकाश फातर्पेकर –

२०१४ पर्यंत शिवसेनेला चेंबूरमध्ये विजय मिळवण्यात अपयश आलं होतं. मात्र २०१४ च्या निवडणुकांमध्ये प्रकाश फातर्पेकर यांनी दोन वेळचे  माजी आमदार आणि मुंबई काँग्रेसमध्ये वजन असणाऱ्या चंद्रकांत हांडोरे यांचा पराभव केला. २०१९ मध्ये त्यांनी पुन्हा एकदा हांडोरे यांना पाणी पाजलं.

हांडोरे यांच्यासारखा तगडा उमेदवार मित्रपक्षात असूनही फातर्पेकर यांनी शिवसेनेतच थांबण्याचा निर्णय घेतला आहे हे विशेष.

१४) भास्कर जाधव –

उद्धव ठाकरे यांच्याकडे शिवसेनेची सूत्रं आल्यानंतर शिवसेनेला जय महाराष्ट्र करणारं पहिलं मोठं नाव होतं, ते म्हणजे भास्कर जाधव. शिवसेनाप्रमुखांना भेटायला मातोश्रीवर भेटायला आलेल्या जाधवांची भेट लवकर झाली नाही आणि उद्धव ठाकरेंचे स्वीय सहाय्यक मिलिंद नार्वेकर यांच्यावर तोफ डागत त्यांनी सेना सोडली.

१९८४ पासून शिवसेनेत कार्यरत असणाऱ्या भास्कर जाधवांनी सेना सोडणं हा त्याकाळी मोठा धक्का मानला जात होता. शिवसेनेला जय महाराष्ट्र केल्यानंतर त्यांनी अपक्ष म्हणून निवडणूक लढवली, त्यात त्यांचा पराभव झाला.

त्यानंतर २००९ मध्ये ते राष्ट्रवादीच्या तिकिटावर गुहागरमधून निवडून गेले. त्यांना राज्यमंत्रीपद, राष्ट्रवादीचं प्रदेशाध्यक्ष पद आणि रत्नागिरीचं पालकमंत्री पदही मिळालं. २०१४ मध्ये त्यांनी पुन्हा राष्ट्रवादीच्याच तिकिटावर निवडणूक जिंकली.

२०१९ च्या निवडणुकीत त्यांनी हातात शिवबंधन बांधलं आणि आमदारकीची हॅटट्रिक पूर्ण केली. ज्यावेळी भास्कर जाधवांनी शिवसेना सोडली होती, अगदी तशीच परिस्थिती असताना ते उद्धव ठाकरेंसोबत आहेत, हे नक्कीच लक्षात घेण्यासारखं आहे.

१५) राजन साळवी –

सलग तीन वेळा राजापूरमधून निवडून आलेले राजन साळवी, उद्धव ठाकरेंचे कट्टर समर्थक मानले जातात. कोकणातून निवडून आलेले जे मोजके आमदार उद्धव यांच्यासोबत आहेत, त्यात साळवी यांचं नाव येतं.

१६) वैभव नाईक –

शिवसेनेचे जायंट किलर म्हणून वैभव नाईक ओळखले जातात. याचं कारण म्हणजे २०१४ च्या विधानसभा निवडणुकीत त्यांनी राज्याचे माजी मुख्यमंत्री आणि माजी शिवसेना नेते नारायण राणे यांचा तब्बल १० हजार मतांनी धक्कादायक पराभव केला होता. २००९ मध्ये कुडाळ मतदारसंघात राणेंनी नाईक यांचा २४ हजार मतांनी पराभव केला होता. मात्र २०१४ ला नाईक यांनी दणक्यात कमबॅक केलं.

‘बाकीचे आमदार मंत्रिपदाच्या लालसेपोटी बंडखोर गटात गेले आहेत. नारायण राणेंनी शिवसेना सोडल्यानंतर सिंधुदुर्ग जिल्ह्यात शिवसेनेचा झेंडा रोवण्यासाठी कार्यकर्ते नव्हते, मात्र त्याच राणेंना गाडण्याचं काम कोकणातल्या जनतेनं केलं. शिवसेना कधीही संपणार नाही,’ असं वक्तव्य करत त्यांनी आपण उद्धव ठाकरेंसोबतच असल्याचं सांगितलं आहे.

ही १६ नावं आहेत, उद्धव ठाकरेंसोबत असलेल्या विधानसभेतल्या आमदारांची. मात्र सभागृहाबाहेरही उद्धव ठाकरेंसोबत निर्णायक लढा देणारी आणखी ५ महत्त्वाची नावंही आहेत.

१७) सुभाष देसाई –

बाळासाहेबांच्या काळापासून शिवसेना गाजवणारं नाव म्हणजे सुभाष देसाई. १९९० मध्ये देसाई पहिल्यांदा आमदार झाले, त्यानंतर सलग तीनवेळा आमदार, विधान परिषदेची आमदारकी, मंत्रीपद आणि शिवसेना नेतेपद अशा अनेक भूमिका देसाई यांनी बजावल्या. शिवसेनेत झालेली बंड आणि एकनाथ शिंदे यांच्यासोबत अनेक निष्ठावान सहकारी गेलेले असतानाही देसाईंनी उद्धव ठाकरेंची साथ सोडली नाही.

वयाच्या ७९ व्या वर्षीही त्यांनी शिवसेनेतच राहणं पसंत केलं.

१८) चंद्रकांत खैरे –

औरंगाबाद जिल्हा हा शिवसेनेचा बालेकिल्ला समजला जातो. जिल्ह्यात सेनेचे एकूण ६ आमदार आहेत, त्यातले ५ आमदार एकनाथ शिंदे गटात आहेत. चंद्रकांत खैरे हे औरंगाबादचे माजी खासदार. २०१९ च्या लोकसभा निवडणुकीत त्यांना पराभव स्वीकारावा लागला, औरंगाबादमध्ये मनसेनं आपली ताकद वाढवण्यास सुरुवात केली आहे. त्यात बंडखोरांमुळं ताकद खिळखिळी होणार असली, तरी चंद्रकांत खैरेंनी शिवसेना आणि उद्धव ठाकरेंना अंतर दिलं नाही.

१९) अनिल परब –

सामान्य शिवसैनिक ते मंत्री असा प्रवास करणारं नाव म्हणजे अनिल परब. परब हे फक्त उद्धव ठाकरेंचेच नाहीत, तर बाळासाहेब ठाकरेंचेही निकटवर्तिय समजले जायचे. मंत्रीपद मिळाल्यानंतर परब आक्रमक झाले होते. एकनाथ शिंदेंनी बंड पुकारल्यानंतर लगेचच अनिल परब यांच्याभोवतीचा ईडीच्या चौकशीचा फास आवळला गेला. पक्षात अभूतपूर्व असं बंड झालं आणि त्याचवेळी परब यांची दिवसभर चौकशी सुरू होती. दडपण वाढत गेलं, तरीही परब हे उद्धव ठाकरेंसोबतच राहिले.

२०) मिलिंद नार्वेकर –

शाखाप्रमुख बनण्यासाठी आलेले नार्वेकर उद्धव ठाकरेंचे स्वीय सहाय्यक बनले. तेव्हापासून आजपर्यंत ते उद्धव यांच्यासोबतच आहेत. आमदारांच्या बंडखोरीनंतर मिलिंद नार्वेकर यांच्यावर टीका झाली, त्यांना यासाठी जबाबदारही धरण्यात आलं. मात्र विधानसभा, विधान परिषद अशी कुठंही संधी मिळाली नाही, तरीही नार्वेकरांनी उद्धव ठाकरेंची साथ काय सोडली नाही.

२१) संजय राऊत –

महाविकास आघाडी सरकार स्थापन करण्यात महत्त्वाचा वाटा राऊत यांचा होता. सत्ता मिळाल्यावरही राऊत सातत्यानं भाजपचा सामना करत राहिले, वेळोवेळी आक्रमकपणे त्यांनी पक्षाची भूमिका मांडली. बंडाच्या चर्चा शिगेला पोहोचल्या आणि संजय राऊतांना ईडीचं समन्स आलं, दुसऱ्या बाजूला बंडखोर आमदारांनी या बंडाला संजय राऊत जबाबदार असल्याचा ठपका ठेवला, चहुबाजुंनी कोंडी झाल्यानंतरही संजय राऊत अगदी उद्धव ठाकरेंनी राजीनामा देण्याच्या आधीपर्यंत माध्यमांसमोर खिंड लढवत होतेच.

बघायला गेलं, तर या २१ जणांमध्ये काहीजण असे आहेत, ज्यांची आमदारकीची पहिली किंवा दुसरीच टर्म आहे. बऱ्याच जणांकडे मोठी पदं नाहीत, काही जणांची ईडी चौकशीही सुरू आहे, तरीही त्यांनी उद्धव ठाकरेंची साथ सोडली नाही. हे प्रमुख २१ जण आणि शिवसैनिकांच्या जोरावरच उद्धव ठाकरेंना शिवसेना पुन्हा उभी करण्याचा विश्वास आहे…

हे ही वाच भिडू 

• शिवसेना महाविकास आघाडीत गेल्याने नाराज होऊन राजीनामा देणारा तो पहिला शिवसैनिक ठरला होता…
  
• म्हणून एकनाथ शिंदेंना गटाला “शिवसेना बाळासाहेब ठाकरे” हे नाव देणं अवघड जाईल..
  
• बाळासाहेब ठाकरेंनी “शिवसेनाप्रमुखपदाचा” राजीनामा समोर ठेवूनच पेटलेलं बंड शांत केलं होतं