नुसता आठवणीत रमत नाही तर ‘बदली’ मराठी शाळेची अवस्था दाखवून काळजाचा ठाव घेते

By टिम बोलभिडू On Jan 26, 2022

लॉन्ग शॉट

पावसाळी दिवस आहेत. एका डोंगरावर मोठमोठ्या पवनचक्क्या मधून वाट काढत हिरव्यागार वातावरणातून वाट काढत एक पांढरी कार चालली आहे. मागे बॅकग्राउंड ला आवाज येतोय,

पाटील गुरुजी म्हणजे शाळेचं वैभव आहे. पण दुर्दैव असं की त्यांची बदली दुर्गम भागात झाली आहे.

आता या गुरुजींना रिसिव्ह करायला आलेला तरुण त्यांना सांगतो की त्या गावात कार पोहचत नाही. भर पावसात डोक्यावर इरलं बांधून दरी कोपरे ओलांडून ती दोघं चिखल राडीतून शाळेपर्यंत पोहचतात. तिथं बघतात तर राडीमध्ये खेळत असलेली दोनच मुलं. दोघांचीच शाळा.

पाटील गुरुजींच्या पुढ्यात काय वाढून ठेवलं आहे याची कल्पना आपल्याला देखील येते.

हा आहे ट्रेलर दुर्गम खेड्यातल्या शिक्षण व्यवस्थेचा धांडोळा घेणाऱ्या ‘बदली’ या वेबसिरीजचा. आपल्या प्रत्येकाच्या आठवणीत गाव, तिथली जिल्हा परिषदेची शाळा, आपले दोस्त, खाकी चड्डी आणि पांढऱ्या शर्टचा गणवेश हे फिट्ट बसलेलं असतं. आजकालच्या गळ्यात टाय बांधून जाणाऱ्या हायफाय इंग्लिश शाळांच्या जमान्यात गावाकडच्या शाळा या आठवणीपुरत्या उरल्या आहेत हे नक्की. पण या जमान्यातही गावाकडच्या शाळा सुरूच आहेत. फक्त त्यांचे प्रॉब्लेम्स तिथली व्यवस्था यापासून आपण दूर आलोय. याच व्यवस्थेचं चित्रण बदली या वेब सिरीजमध्ये दाखवण्यात आलंय.

१५ वर्ष जिल्ह्याच्या शाळेत शिकवणारे पाटील गुरुजी. कार घर शिक्षिका असणारी बायको छोटा मुलगा असं सुखवस्तू त्रिकोणी कुटुंब. रेषेत चालणाऱ्या पाटील गुरुजींची अचानक बदली होते आणि त्यांचं आयुष्य बदलून जातं.

सुरवातीला काहीश्या नाराजीने या दुर्गम खेड्यात आलेले गुरुजी शेणघाण तुडवून विद्यार्थी गोळा करू लागतात. रोज डोंगर उतरून फक्त शिकवण्यासाठी जावे लागणारे पाटील गुरुजी तिथल्या मुलांच्या, व्यवस्थेच्या प्रश्नाशी भिडतात. अगदी शाळेची फरशी स्वच्छ करण्यापासून ते स्वतःसोबत गाव आणि तिथली शाळा व्यवस्था बदलण्याचा प्रयत्न करतात हे या मालिकेत दाखवलं आहे.

विशेष म्हणजे ही मालिका फक्त प्रश्न मांडत नाही तर त्यावर उत्तर देखील शोधण्याचं काम करते. बंद पडत असलेल्या मराठी शाळा, इंग्रजी माध्यमाविषयी वाढत असलेलं आकर्षण यांचा बुरखा फाडण्याचं काम देखील बदली सिरीज करते.

एका इंजिनिअरने सगळ्या बॉलिवूडला दाखवून दिलं, सामाजिक…

Mar 5, 2023

आमिर खानने पत्ता कट केला नसता तर, मंगल पांडेत ऐश्वर्या राय…

Jan 28, 2023

प्रत्यक्ष जिल्हापरिषदेच्या शाळेत शिक्षण झालेल्या जिल्ह्यातल्या वेखंडवाडी या छोट्या गावातून आलेल्या नितीन पवार या तरुणाने लेखणीतून भानावर आणणारे तिखट वास्तव उभे केले. त्यांनीच दिग्दर्शनही केले आहे.

गावाकडच्या गोष्टी मधून नितीन पवार यांनी अनेक कथा हाताळल्या होत्या मात्र बदली या वेब सिरीजमधून त्यांनी एज्युकेशनल सिस्टीमवर खणखणीत भाष्य केलं आहे. छोट्या छोट्या प्रसंगातून उभी राहणारी कथा, सोपे आणि थेट भिडणारे डायलॉग ही या वेबसिरीजची ताकद आहे. सातारच्या नितांत सुन्दर अशा ग्रामीण भागात केलेलं चित्रीकरण एखाद्या बिग बजेट सिनेमापेक्षाही जबरदस्त झालेलं आहे.

अमोल देशमुख यांनी पाटील गुरुजींचा रोल साकारला आहे. एफटीआयआय मध्ये शिक्षण झालेल्या देशमुख यांनी यापूर्वी देखील नेटफ्लिक्स व इतर ऑनलाईन प्लॅटफॉर्मवर अभिनय केला असल्यामुळे आपल्यापैकी अनेकांना हा चेहरा ओळखीचा होता. पण शिक्षकाची हि भूमिका त्यांच्यासाठीही आव्हानात्मक होती. त्यांच्यासोबतच मेघा घाडगे, तन्वी कुलकर्णी, स्वप्नील पवार, छाया सागावकर आणि स्थानिक कलाकारांनी जीव ओतून या सिरीजमध्ये काम केलं आहे. के टी पवार हे गावाकडच्या गोष्टीतले बापू सुद्धा यात वेगळ्या भूमिकेत आहेत.

कोयनेच्या खोऱ्यात सलग पंचवीस दिवस डोंगर उतरून, पाऊस वारा वादळ याचा विचार न करता कोरी पाटी प्रॉडक्शनच्या टीमने ८ भागांच्या या मालिकेच चित्रीकरण केलं. ग्रामीण भागातील प्रश्न, शहरात जाण्याची स्वप्न बघत रोजमरणाच्या जगण्याशी लढा देणाऱ्या तिथल्या फाटक्या माणसांच्या गोष्टीची जाणीव या सीरिजच्या निमित्ताने होते.

लहानपणी आपल्या लाडक्या गुरुजींच्या बदलीमुळे आपणही भावुक होत होतो पण शहरी वातावरणातून थेट दुर्गम भागात जाणाऱ्या शिक्षकांचे प्रॉब्लेम्स कधी लक्षातच आले नाहीत.

१५ जानेवारीला रिलीज झालेला बदली ही वेबसिरीज तुमच्या आमच्या लहानपणीच्या आठवणी जाग्या तर करतेच शिवाय आपण गावाकडे सोडून आलेले प्रश्न आणि त्याची दाहकता, सध्याच्या शैक्षणिक व्यवस्थेतील प्रश्न पुन्हा नव्याने जळजळीतपणे समोर आणते. प्लॅनेट मराठीच्या प्लॅटफॉर्मवर हि वेबसिरीज पाहण्यासाठी उपलब्ध आहे, मराठी शाळेसाठी थोडी जरी भावनिकता उरली असेल तर बघा नक्की.

हे ही वाच भिडू.