हेअरकट करणाऱ्याने काही इंचाची चूक केली आणि ताईंनी २ कोटी रुपये भरपाई घेतली

जगात केसांच्या एवढ्या भारी भारी स्टाईल्स केल्या जातात की, भिडू काय सांगू अख्खा दिवस त्या फेसबुकवरचे रिल्स बघण्यात जातो. कधीकधी वाटत आपल्याला कसा दिसेल हा कट, नाहीतर मग कलर. मग उगाच आपलं आरशात जाऊन बघायचं, केसातनं हात फिरवायचा आणि तेवढ्यावरच समाधान मानायचं. कारण आपल्या खिशात नसते तेवढी दमडी, नाही का ? आणि त्यात जर साध्या सलून मध्ये जाऊन कारभार केला तर तो एकतर चुकतो. आणि चुकल्यावर सलूनवाला म्हणतो,

भैय्या जी आपने जैसा कहा था वैसे ही किये हूँ । उस फोटो सें अच्छा हुआ हैं। 

तो असं बोलला की मग काय बोलायचं त्याला म्हणत, गपगुमान निघून यायचं त्या दुकानातन. आणि स्वतःलाच कोसायचं. असो…

तर आज सकाळीच एक अजब बातमी वाचली. बातमी होती केसांसंबंधित. 

दिल्लीत अशी एक घटना उघडकीस आलीय ज्यात चुकीच्या पद्धतीनं केस कापल्याबद्दल महिलेला २ कोटी रुपयांची भरपाई देण्यात आलीय.

आयला… म्हणलं कसलं काय लेका, भारीच की म्हणत पुढं वाचलं !

तर दिल्लीच्या हॉटेल आयटीसी मौर्यच्या सलूनमध्ये कर्मचाऱ्यानी चुकीच्या पद्धतीनं केस कापल्याबद्दल आणि चुकीची ट्रिटमेंट दिल्याबद्दल एका महिलेला राष्ट्रीय ग्राहक विवाद निवारण आयोगाच्या मध्यस्थीनं हॉटेल आयटीसी मौर्यकडून २ कोटी रुपयांची भरपाई देण्यात आलीय.

त्याच झालं असं होत की, १२ एप्रिल २०१८ सालात केसांची जाहिरात करणारी एक मॉडेल दिल्लीच्या हॉटेल आयटीसी मौर्यच्या सलूनमध्ये आपला हेअरकट करून घ्यायला गेली होती. तिने आजवर VLCC आणि Pantene शॅम्पूसाठी मॉडेलिंग केलय. त्यावेळी तिला एका शूटच्या असाइनमेंटला जायच होतं.

त्या महिलेने तिची नेहमीची हेअर स्टाइलर बोलावली. पण ती त्या दिवशी आली नव्हती. मग त्या नेहमीची हेअर स्टाइलर ऐवजी दुसरा एक कर्मचारी तिला तिचा हेअर कट करून देतो म्हंटला. मग तिने त्याला सांगितलं की बाबा रे खालून फक्त चार इंच एवढेच केस काप. पण या बाबाने तिचे एक्स्ट्रा इंच केस कापले. झालं… ते पाहून संबंधित महिला रागावली.

त्या बाबाच्या या कारनाम्यामुळे तिला चांगली असाइनमेंट गमवावी लागली. तसच केसांवरच्या ट्रीटमेंटसाठी वापरलेल्या प्रोडक्टनंही तिच्या टाळूवर सूज आली आणि तिचं नुकसान झालं. आणि तिला मोठ नुकसान सोसाव लागल. यामुळे तिची लाइफस्टाइल पूर्णपणे बदलली आणि तिच टॉप मॉडेल बनण्याच स्वप्न धुळीस मिळाल. तिला चित्रपटातील भूमिका देखील ऑफर करण्यात आली होती. पण चुकीच्या हेअर कटमुळे तिला सर्व गमवावं लागलंय.

या सगळ्यामुळं पोरगी स्ट्रेस मध्ये गेली ना राव…

मग तिने राष्ट्रीय ग्राहक विवाद निवारण आयोगाकडे तक्रार दाखल केली. तिची ही केस जवळजवळ दोन वर्ष चालली. आणि नंतर न्यायमूर्ती आर. के. अग्रवाल आणि डॉ. एस. एम. कांतीकर यांनी आदेश दिला की, तिला झालेल्या मनस्तापाबद्दल त्या केशकर्तनालयाने तिला दोन कोटी रुपये नुकसान भरपाई द्यावी.

त्याचबरोबर न्यायालय म्हंटल कि,

स्त्रिया त्यांच्या केसांच्या बाबतीत अत्यंत सावध आणि काळजी घेतात, यात शंका नाही आणि त्यांनी केस चांगल्या स्थितीत ठेवण्यासाठी एक मोठा खर्च केलाय, यातही दुमत नाही. त्या भावनिकरित्या त्यांच्या केसांशी जोडलेल्या असतात. तिच्या लांब केसांमुळे तक्रारदार महिला ही हेअर प्रॉडक्टची मॉडेल होती. तिचे केस अशा पद्धतीनं कापण्यात आल्यानं तिला गंभीर मानसिक धक्का बसलाय. ती तिच्या नोकरीवर लक्ष केंद्रित करू शकत नाहीये. आयटीसी हॉटेल्स लिमिटेडच्या चुकीमुळे तिला हा मनस्ताप सहन करावा लागतोय. गेल्या दोन वर्षांपासून ती महिला वेदना आणि आघात सहन करत आहे, त्यामुळे लवकरात लवकर तिला पैसे द्यावेत. 

आता तुम्ही म्हणाल तिला पैसे मिळतील, आम्हाला काय त्याच ? तर जनाब रुको जरा, और सुनो…आयोगानं आता जर या केशकर्तनालयासाठी निर्णय दिला असेल तर इथून पुढं ही जर कोणत्या बाबानं केस चुकीचे कापले तर त्यांना पण असाच दणका दिला जाऊ शकतो. पण तक्रार दाखल झाली तरच.

बरं झालं बाई पेटल्या आणि तक्रार दाखल केली. आता इथून पुढं केस कापणारा कोणताही बाबा म्हणणार नाही की,

भैय्या जी आपने जैसा कहा था वैसे ही किये हूँ । उस फोटो सें अच्छा हुआ हैं। 

हे ही वाच भिडू 

• एखादी ऑडिओ क्लिप व्हायरल झाल्यानंतर त्याच्या खरेपणाचा तपास कसा करतात?
• चार्ली आणि हॅरीचा हा व्हायरल व्हिडीओ साडे पाच कोटींना विकला गेलाय
• वो खुर्चीवाले चच्चा अस नेमकं काय झालं की अमेरिकन चच्चा बर्नी सैंडर्स व्हायरल झाले